"Табыс артып, төлем ұлғаяды". Қарин "Ұлттық қор – балаларға" жобасы туралы

"Ұлттық қор – балаларға" жобасы аясында жасалатын төлем көлемі ұлғаяды. Бұл туралы Мемлекеттік кеңесші Ерлан Қарин айтты, деп хабарлайды BAQ.KZ.

Мемлекет басшысының бастамалары біртіндеп орындалып жатыр. Қасым-Жомарт Тоқаевтың сайлау алдындағы бағдарламасында айтылған негізгі бастаманың бірі – «Ұлттық қор – балаларға» жобасы іс жүзінде жүзеге асырылып, балаларымыздың есеп-шотына Ұлттық қордан төлемдер түсе бастады. Қаражаттың төлену тәсілдері туралы Үкімет пен Бірыңғай жинақтаушы зейнетақы қорының өкілдері егжей-тегжей түсіндірді. Алдағы уақытта бөлінетін төлем Ұлттық қор активтерінің еселенуіне және қосымша инвестициялық табыстың артуына байланысты ұлғаятын болады, - деп жазды Ерлан Қарин Telegram арнасындағы жазбасында.

Бұған дейін "Ұлттық қор - балаларға" бағдарламасы бойынша алғашқы нысаналы талаптар мен нысаналы жинақтар түскенін жазған едік.