Түркістанның Қазығұрт ауданында 15 әлеуметтік дүкен жұмыс істейді

Астана, BAQ.KZ. Түркістан облысының әкімі Жансейіт Түймебаев өңірде азық-түлік бағасының тұрақтылығын қамтамасыз ету және бақылауға алу үшін тиісті шараларды жүзеге асыруды аудан, қала басшыларына жүктеген болатын. Бүгінде осы тапсырманы орындау мақсатында Қазығұрт ауданында 15 әлеуметтік дүкен жұмыс іске қосылып отыр. 

Түркістан облысы әкімінің баспасөз қызметінің мәліметінше, халық көп шоғырланған ауылдық округтерде орналасқан дүкендер аз қамтылған отбасыларға азық-түлікті нарықтағыдан 15-20%-ға арзан бағада сатуда.

«Сондай-ақ, көпбалалы отбасыларға демеушілер есебінен тегін азық-түлік, киім-кешек басқа да тұрмыстық заттар тегін таратылуда. Бір күнде Қазығұрт ауданында 20 көпбалалы ана мен аз қамтамасыз етілген отбасыға жалпы құны 200 мың теңге болатын азық-түлік үлестірілді», - делінген хабарламада.

Сонымен қатар, орталықтан «Балақай» әлеуметтік дүкенінде 20-дан астам отбасының мектеп жасындағы балаларына 130 мың теңге көлеміндегі киім-кешек ұсынылды.

Одан бөлек, көпбалалы аналар мен аз қамтылған 58 отбасыға 858 мың теңге шамасында көмек көрсетілді.