Түркістанда халықаралық әуежайдың құрылысы қарқынды жүруде

Нұр-Сұлтан, BAQ.KZ. Түркістанда халықаралық әуежайдың құрылысы қарқынды жүруде, деп хабарлайды облыстық өңірлік коммуникациялар қызметі.

Түркістан қаласында халықаралық әуежай салуға облыстан 35 шақырым қашықтағы Кентау қаласына қарасты Шаға елді мекені тұсынан орын белгіленген.

Бүгінде әуежайдың құрылысын жүргізіп жатқан – «Turkistan International Airport» ЖШС инвесторы. Мердігер мекеме – түркиялық «YDA Group» компаниясы. Қазіргі таңда құрылыс алаңында инвестордың 341 жұмысшысы мен 106 бірлік техникасы жұмылдырылған.

Бүгінде әуежай терминалының конструкциялық жұмыстарының 90 пайызы аяқталған. Ұшу-қону жолағы мен перронның 2 қабат шағал-тасты қоспасы және рульдеу жолының 1 қабат шағал-тасты төселімінің жұмысы аяқталды.
Әуежайды пайдалануға беру мерзімі – жоба бойынша мемлекеттік жекешелік әріптестік келісімшарты рәсімделгеннен кейін ғана белгілі болады. Алдын ала болжам бойынша 2020 жылдың аяғына дейін құрылыс жұмыстарын аяқтау жоспарлануда, - делінген хабарламада.

Айта кетерлігі, әуежай терминалының жолаушыларды өткізу мүмкіндігі - сағатына 450 жолаушы, аумағы 10,5 мың шаршы метр, ал ұшу-қону жолағының параметрі 3300х45 метрді құрайтын болады.