Түркістан облысында жаңбырлатып суару әдісі қолданылады

"Осы мақсатта АҚШ-тан 18 бірлік суару машинасы және 27 ауылшаруашылығы техникасы сатып алынған. Жалпы құны 1,5 млрд теңгеге жуық лизингілік шарт  несиелендірілуде. Жаңа суару әдісінің  арқасында тіпті диқандардың өз күштерімен игере алмай жүрген бос жатқан жерлері тиімді пайдаланылатын болады. Жаңбырлатып суару әдісі болашақта киелі Түркістан өлкесінің көгалдандырылуымен  жаңа микроклиматтың қалыптасуына оң әсерін тигізеді. Әзірге бұл жұмыс түрі облыс орталығынан 12 шақырым жерде орналасқан Шаға ауылынан бастау алмақ", - делінген таратылған ақпаратта.

Бүгінгі таңда бөлінген 200 гектар жердің тең жартысынан астамы жыртылып, өңделген. Дәнді-дақылдардың ұрығын жеткізуді "Қазақ егіншілік және Өсімдік шаруашылығы ғылыми-зерттеу институты"ЖШС жүзеге асырды. Аталған институт кейіннен барлық агротехникалық іс-шараларға қолдау көрсететін болады. Ауыл шаруашылығы саласында кеңінен етек жайғалы отырған машина станциясының тиімді тұстары көп.

"Техникалық қызмет көрсетуде қарапайымдылығымен ерекшеленеді. Әрі қауіпсіз. Энергия көзі ретінде дизель генераторы қолданылады. Ең бастысы – экономикалық тиімді. Жаңбырлатып суару әдісінің арқасында арықпен суарылған жерлерге қарағанда астық молырақ жиналады", - делінген таратылған ақпаратта.