Сыртқы істер министрі Иордания елшісін қабылдады

Премьер‑министрдің орынбасары – Сыртқы істер министрі Мұрат Нұртілеу Иордания Хашимит Корольдігінің Қазақстандағы елшісі Хамза Махмуд Юсеф Әл-Омариді қабылдады, деп хабарлайды BAQ.KZ сыртқы саяси ведомствоға сілтеме жасап.

Сұхбат барысында тараптар саяси, сауда-экономикалық және мәдени-гуманитарлық салалардағы екіжақты ынтымақтастықтың қазіргі жағдайы мен перспективаларын талқылады.

Өзара сауданы дамыту бойынша күш-жігерді жандандыруға ерекше назар аударылды. Осы тұрғыда Қазақстан-Иордания үкіметаралық комиссиясының 5-ші отырысының қорытындылары аталып өтті.

Сондай-ақ дипломаттар халықаралық ұйымдар аясындағы көпжақты ынтымақтастыққа жоғары баға беріп, жаһандық күн тәртібіндегі өзекті мәселелер бойынша пікір алмасты.

Кездесу соңында сұхбаттастар биылға биік және жоғары деңгейде жоспарланған екіжақты іс-шаралар кестесін талқылады.