Су тасқынынан соң салынған үйлерге кепілдік беріледі – министр

Өнеркәсіп және құрылыс министрі Қанат Шарлапаев су тасқынынан кейін салынған үйлердің сапасы туралы айтты, деп хабарлайды BAQ.KZ тілшісі.

"Тасқыннан кейін салынған 2500-ден астам үйлерге қанша мерзімге кепілдік беріледі? 4-5 жылдан кейін бұл үйлер бұзылып жатса, кім жауап береді?", - деп сұрады журналист үкіметтің баспасөз орталығында өткен брифингте.

Өте орынды сұрақ. Әрине, кепілдік береміз. Мысалы, шамамен 2600 үйдің басым бөлігі жер үйлер. Қазір осындай ғимаратты салған мердігер үйге кепілдік береді. 2 жылдың ішінде осы үйге бірдеңе болса, мердігер оны жөндеуге міндетті болады. Әр үйге 2 жыл кепілдік береміз, - деді Шарлапев.

Ведомство басшысы су тасқынының салдарынан бүлінген бүкіл ғимаратқа техникалық тексеру жүргізілгенін айтады.

"Тексеру қорытындысы бойынша 9 156 үй жөнделді, ал 8 447 үй қалпына келтіруге жатпады. Нәтижесінде, нарықтан 5 767 үй мен пәтер сатып алынды. 2 680 жаңа үйдің құрылысы басталды. Жаңа тұрғын үй салу алаңдарын таңдау барысында оларды келешекте су басудан шектеу үшін жергілікті жердің рельефтері мен ландшафты ескерілді. Бүгінде 2 576 үйдің құрылысы аяқталды. Құрылыс жұмыстары мамырдың соңында басталып, 4 айда аяқталды, – дейді құрылыс министрі.