Су тасқынына қарсы 2 мыңға жуық әскери қызметші жұмылдырылды

Қарулы күштердің су тасқынына қарсы шараларға қатысуы туралы Қорғаныс министрлігінің ресми өкілі Руслан Жангулин мәлім етті, деп хабарлайды BAQ.KZ тілшісі.

Өткен тәулікте су тасқынына қарсы шараларға қарулы күштердің жеке құрамынан 2 мыңға жуық әскери қызметші, 83 әскери техника, 3 бірлік тікұшақ және 4 әскери техникалық авиациясы жұмылдырылды. 74 ауыл тұрғыны көшірілді. Әскери көліктік авиациямен 303 адам 5 тоннадан аса жүк тасымалданды. Және жеке құрамның көмегімен 32 мыңға жуық құм салынған қапшықтар толтырылып, оларды төсеу жұмыстары жүргізілді, - деп атап өтті ол.

Сондай-ақ Орал қаласына Қызылордадан 200 әскери қызметші бөлінді, Атырау облысына Оңтүстік өңірлік қолбасшылық әскери бөлімінен 1мыңнан аса әскери қызметші бөлінді. 

Ал Петропавлға Қарағанды қаласынан 300-ден аса әскери қызметші келсе, Орал қаласына әскери көліктік авиация құралдарымен десанттық шабуылдау әскерлерінің әскерилері Талдықорғаннан – 200 адам, Алматыдан - 103 адам жеткізілді.