Су тасқыны: Зардап шеккен өңірлерге 1 мың тонна гуманитарлық көмек жеткізілді

Бұл туралы ТЖМ Азаматтық қорғаныс және әскери бөлімдер комитетінің аға офицері Ерасыл Сайпаш Орталық коммуникациялар қызметінің алаңында өткен баспасөз мәслихатында мәлімдеді, деп хабарлайды BAQ.KZ.

Зардап шеккен өңірлерге 1 мың тонна гуманитарлық көмек жеткізілді. Атырау облысының Құлсары қаласын азық-түлікпен қамтамасыз ету үшін мемлекеттік материалдық резервтен 264 тонна азық-түлік броньнан шығарылды. Атырау және Батыс Қазақстан облыстарында су тасқынын жоюға жұмылдырылған әскери қызметшілер үшін қосымша 92 тонна азық-түлік өнімдерін броньнан шығарылады, - деп атап өтті спикер.

Айтуынша, бірнеше өңірде су тасқынын жою үшін қажетті жабдықтар броньнан шығарылады.

Сонымен қатар 8 облыстағы су тасқынын жою үшін мемлекеттік материалдық резервтен арнайы және инженерлік техникалар, төсек-орын жабдықтары, далалық ас үйлер, наубайханалар, шатырлар броньнан алынады, - деп атап өтті ведомство өкілі.