Су тасқыны салдарын жоюға үлесін қосқандар марапатталды

Көкшетауда су тасқыны салдарын жоюға белсенді қатысқан ақмолалықтар ТЖ министрінің наградаларымен марапатталды, деп хабарлайды BAQ.KZ.

Мерекеге қатысушылардың қатарында әртүрлі мамандықтардың өкілдері: дәрігерлер, кәсіпкерлер, жүргізушілер, механизаторлар, мемлекеттік қызметкерлер бар. Олардың барлығы құтқарушылармен бірге батылды танытып, апаттан зардап шеккендерге барынша көмек көрсетті. ТЖ министрінің бұйрығымен 39 адам марапатқа ие болды. Ақмола облысы ТЖД бастығы Қанат Доспаев қарапайым ақмолалықтардың көрсеткен көмегі зілзалаға қарсы күресте зор үлес қосқанын атап өтті.

Салтанатты жағдайда «Суға батқандарды құтқарғаны үшін», «Құтқару операцияларына белсенді қатысқаны үшін» және «Төтенше жағдай жағдайдағы ерлігі үшін» медальдары табысталды. Сондай-ақ, бірқатар азаматтар Қазақстан Республикасы ТЖМ грамоталарымен және алғыс хаттарымен марапатталды. Іс-шара концерттік бағдарламамен аяқталды.