Су тасқыны. БҚО-да мемлекет есебінен қосымша 1500 пәтер сатып алынады

Су тасқынынан зардап шеккен Батыс Қазақстан облысының тұрғындары үшін 775 үй салынады, мемлекет есебінен қосымша 1500 пәтер сатып алынады, деп хабарлайды BAQ.KZ.

Бұл туралы Мәжіліс депутаты, «AMANAT» партиясы фракциясының мүшесі Нартай Сәрсенғалиев Теректі ауданы Подстепное ауылының тұрғындарымен кездесу барысында айтты. Елді мекен Орал қаласынан 10 шақырым қашықтықта орналасқан. Су тасқыны кезінде аталған ауыл өзге елді мекендерге қарағанда көбірек зардап шекті – 481 отбасы баспанасынан айырылды. Бүгінде Теректі ауданында бір қабатты 131 үйдің құрылысы жүргізілуде. Әр үйдің жалпы ауданы – 80 шаршы метр. Подстепное ауылында 106 салынады. Бұл жұмысқа 10 мердігер компания жұмылдырылған. 670 үй иесі 100 АЕК (369 200 теңге) мөлшерінде біржолғы материалдық көмек алды. 506 үй иесінің материалдық шығынының орнын толтырылды. Ауылда мектепті жөндеу жұмысы басталды. Жол жөндеуге және бөгеттерді қалпына келтіруге бюджетке өтінім берілді.

Депутаттар алғашқы күннен-ақ оқиға орнынан табылды. Өз басым, зардап шеккен отбасылармен бірнеше рет кездестім, су тасқынына қарсы іс-қимыл бойынша әкімдіктермен бірге жұмыс істедім, бағалау комиссияларының жұмысына атсалыстым. Барлық мәселе Президент бақылауында болды. Қазір біздің басты мақсатымыз – зардап шеккен жандардың барынша тезірек байырғы өмірге оралуына жағдай жасау, үйлерді, жеке қосалқы шаруашылықтарды, әлеуметтік инфрақұрылымды, балабақшалар мен ауруханаларды қалпына келтіру, – деді Нартай Сәрсенғалиев.