Соңғы 5 жылда пияз алқабы 8 мың гектарға ұлғайған – Жамбыл

Нұр-Сұлтан, BAQ.KZ. Республика бойынша пияздың 75 пайызы Жамбыл облысында өсіріледі. Былтыр аймақта 22 мың гектар жерге пияз егілген. Бірақ су тапшылығы шаруаларға қолбайлау болып отыр, деп хабарлайды jambylinfo.kz.

Соңғы 5 жылда өңірде пияз алқабы 8 мың гектарға ұлғайған. Былтыр егілген 22 мың гектардан 700 мың тоннаға жуық өнім жиналған. Аймақта бас-аяғы 18 мың шаруашылық болса, оның мыңнан астамы пияз егеді. Сұраныс бар кезде осы кәсіппен айналысқысы келетіндер де азаймайды.

Тұтыну нормасымен қарайтын болсақ, жылына біздің облысқа 1 млн 100 мың халыққа 22 мың тоннадай пияз керек екен. Егер Қазақстанға шығатын болса, ел тұрғындары жылына 350-400 мың тонна пияз тұтынады, әрі кетсе 350 мың 400 мың тоннадай пияз керек болады. Қалған өнімдер экспортқа кетеді, – дейді облыстық ауыл шаруашылығы басқармасының бөлім басшысы Дулат Оспанов.

Шаруа қожалығының басшысы Таласбек Шертаев Жамбыл облысында еккен пияз мен Ресей, Иран, Польша, Ауғанстанға экспортталады дейді.

Соңғы екі жылда елде де, сыртта да пиязға деген сұраныс артқан. Алайда су тапшылығы бар. Өңір шаруалары суды көрші елден алуға мәжбүр. Қазір пияз өсіретін шаруашылықтар үшін тамшылатып суару әдісі тиімді болып тұр. Көбі соған көшіп жатыр.

22 мың гектардың 11 мың гектарына тамшылатып суару жүйелері енгізілген. Қазір судың тапшылығы бар. Жамбыл облысы судың 80% Қырғызстаннан алып отыр, – дейді облыстық ауыл шаруашылығы басқармасының бөлім басшысы Дулат Оспанов.

Пияз – өзі орташа есеппен 125-130 күнде өсіп шығатын өнім. 100 күнде де дайын болатындары бар. Тұқымына байланысты. Елде қазір осы пияздың 10 шақты сұрпы бар. Негізінен 3-4 тұқымы молынан егіледі. Оның өзі Голландиядан әкелінеді. Өзімізде сапалы тұқым жоқ. Өнімді сақтау жағынан да проблема баршылық. Облыста көкөніс сақтауға арналған 200-ден аса қойма бар. Бірақ оның өзі жеткіліксіз. Облыста қазір 4 қойма салынып жатыр.