СІМ Мурманскідегі төбелеске қатысты түсінік берді

Нұр-Сұлтан, BAQ.KZ. Ресейдің Мурманск облысында вахталық әдіспен жұмыс істеп жатқандар арасында төбелес болды. Олардың арасында қазақтар бар. Қазақстан Республикасы Сыртқы істер министрлігінің ресми өкілі Айбек Смадияров оқиғаға түсінік берді.

23 наурыз күні, сағат 20:30 шамасында Мурманск облысы Белокаменка ауылының жанындағы Ірітоннажды теңіз құрылымдары орталығының құрылыс алаңдарының бірінде вахталық жұмысшылардың, соның ішінде Қазақстан Республикасы азаматтарының қатысуымен жаппай төбелес орын алды. Бұл жағдай тұрмыстық оқиға сипатына ие. Компания өкілдерінің айтуынша, қазіргі таңда мәселе шешіліп, қызметкерлер қалыпты режимде жұмыс істеп жатыр. Қолда бар мәліметтерге сәйкес, жарақат алғандар және құқық қорғау органдары ұстап алып кеткен азаматтар арасында қазақстандықтар жоқ. ҚР Санкт-Петербургтегі Бас консулдығы мәселені өз бақылауында ұстауда, - деді Айбек Смадияров.

Айта кетейік, әлеуметтік желілерде Мурманск өңірінде қазақтар өзге ұлт өкілдерімен төбелескені туралы видеолар тарап жатыр.