Шымкентте жерасты цех бренд атын жамылып арақ-шарап шығарып отырған

Шымкент қаласында «Absolut», «Зеленая марка» және «Qulan» контрафактілі алкогольдік өнімдерін өндіретін жерасты цехінің жұмысы әшкере болды, деп хабарлайды BAQ.KZ.

Шымкентте «Absolut», «Зеленая марка», «Айдабульская», «Qulan» және тағы басқа брендтердің атын жамылған контрафактілік алкогольді өнімдер өндіретін жерасты цехінің жұмысы әшкере болды. Бұл туралы Әділет министрлігінің ресми өкілі Талғат Уәли мәлімдеді.

Шымкент қалалық Әділет департаменті мен полиция департаментінің қызметкерлері контрафактілік өнімдерді өндірумен айналысқан азаматты анықтады. Оған қатысты ҚР ӘҚБтК-нің 158-бабы (бөтеннің тауар белгілерін заңсыз пайдалану) бойынша іс қозғалды. Тексеру барысында жерасты цехында спирттік ішімдіктерді құюға арналған құтыда, шығу тегі белгісіз 3 000 литр сұйықтық, сүзгі, құю жабдықтары, «Absolut» тауар белгісі бар 720, «Зеленая марка» тауар белгісі бар 1 400 дана бөтелке қақпақтары тәркіленді. Қазіргі уақытта әкімшілік істің материалдары сотқа жіберілді, - деді Талғат Уәли.

Әділет министрлігі қазақстандықтарды контрафактілік өнімдерді тұтынудан аулақ болуға шақырады. Контрафактілі өнімдердің құрамында адам денсаулығына зиян келтіруі ықтимал түрлі улы заттар болуы мүмкін екендігін ескертеді.