Шымкентте азық-түлік дүкенін өртеген ер адам ұсталды 

Нұр-Сұлтан, BAQ.KZ. Шымкент полицейлері қала тұрғынының азық-түлік дүкенін өртеп жіберген азаматты ұстады, деп хабарлады Polisia.kz.

Оқиға 7 қыркүйек түнгі уақытта орын алған. Белгісіз адам жәбірленушінің дүкенін арнайы затпен өртеп жіберіп, қылмыс орнынан бой тасалаған.

Өрт салдарынан дүкен иесіне екі миллион теңге материалдық шығын келтірілді. Осы факті бойынша әл-Фараби ауданының Полиция басқармасы Қазақстан Республикасы Қылмыстық Кодексінің 202-бабының 2-бөлігімен (Бөтеннің мүлкін қасақана жою немесе бүлдіру) сотқа дейінгі тергеп-тексеруді бастады.

Өткізілген жедел-іздестіру іс-шарасы барысында іс бойынша күдікті анықталып, полицияға жеткізілді.