Шымкент. Арбаттағы 1 наурыз

Шымкент, BAQ.KZ тілшісі. Ағаштар бүршік жарып, қызғалдақтар сабағын шығарып, раушандар жапырақ атып, көк шөп біткен күнге шағылысып, жердің шаңы көтеріліп, сәл қалың киінгені терлеп-тепшіген мекен. Шымкенттің күнтізбедегі 1 наурызы осы. Әйтпесе, Шымкенттің көктемі күнтізбеге бағынбайтын-ды.

Сонымен көктемнің алғашқы күні Шымкент саябақтары мен көшелерінен қалай көрінетінін тыстағы жұртшылықтың назарына ұсынамыз.

Сапарымызды Шымкент Арбатынан бастаймыз.

Қысы аяқталмастан көктемі басталатын Шымкентте ақпанның аз күні де таусылғанын 1 наурыз - Алғыс айту күніне таралып жатқан түрлі whatsapp-құттықтаулар еске салды. 
 

Қалың киімді күн райына емес, «қысқы маусым ғой» деп киетін шымкенттіктер үйден шығарда киген күртешесін сағат 11 болмай қолына алатын. Мұны Шымкент арбатының ерсілі-қарсылы жүрген қыз-жігіттерінен байқадық. 
 

Тіпті кейбірі күртешесін қолына алуды ауырсынып, орындықта қалдырғанды құп көріпті. 
 

Арбат ішіндегі қылқанжапырақтылардың діңдерінің арасында түсірілген фотосуреттердің жақсы шығатынын білетін қос ару. 
 

Бірі жеңі жоқ көйлегімен-ақ жүр. «Шымкенттің күні жылы, тіпті ыстық екенін сөзбен жеткізгенше жеңіл киінген қалпымда көрсете салайын» десе керек. 
 

Мұнда бәрі жаймашуақ. Отырыс та, тұрыс та, жүріс те. Бәлкім, әңгіме де. 
 

Бәрі жасыл. 
 

Мына фонтандардың су шашқанын көрген аз, тіпті жоқ. Қосып қояр ма еді, қыс мезгілі екенін күнтізбеден көріп, «қысы - қыс облыстардан ұятты, қоя тұралық» деген болар. Әзірге өшірулі тұр. 
 

Арбатта мұндай фонтандардың тоғызы орнатылған. 
 

Үш аймаққа үшеу-үшеуден бөліп қойылған. Мамыр жетпей, маусымды күтпей қосылып қалар. 
 

Шымкенттің жазы көктем ортасынан басталып кететіні бар. Шымкенттің көктемі тұрмақ қысы да құрғақ. Шаңы әрдайым көтеріліп жатады. 
 

Арбаттағы тазалықтың кепіліне айналған фотодағы кісінің бір міндеті – әр күні фонтан табаны мен жақтауларының шаңын сүрту. 
 

Ұялды ма, жүзін көрсетіп фотоға түспеді. Айтуынша, осы ісін күнде қайталайды. Өйткені, шаң қонып қалады. 
 

Арбат тазалығына жауапты тағы бір жұмысшының және күндегі міндеті орындықтарды шаң-тозаңнан тазарту. Қысы да көктемі де шаңданып жататын Шымкенттің күндерінің бір кейпі осы. 
 

Шымкент Арбатының екі қақпасы бар. Бір қақпасы Республика даңғылынан, енді бір қақпасы Әл-Фараби алаңынан басталып жатыр. 
 

Әл-Фараби алаңындағы қақпасы осы. Мына жаңажылдық инсталляция өткен жылы қойылып еді. 
 

Қазір міне фотовидео түсіретін әсем орынға айналыпты. 
 

Шымкент Арбатының дәл жанында Орыс драма театры орналасқан. Көне ғимарат алдына орындықтар қойылған. 
 

Қала тұрғындары көп келетін орын. Мұндағы апа да ерте көктемдегі күн қызуына бетін беріп, театр алдына жайғасыпты. 
 

Арбаттың Әл Фараби алаңы жағындағы қақпасының жанында Shymbike велотұрағы қойылған. Великті жалға алып, Арбат жанынан түскен веложолақпен де қала ішімен де ызғытуға болады. 
 

Шымкент арбаты былтыр 1 желтоқсан – Тұңғыш президент күніне ашылған. Қала орталығындағы Бейбітшілік көшесінің бір бөлігіне орналасқан Арбаттың ұзындығы 430 метр, ал ені 35 метрді құрайды.