Шұбар шағын ауданына газ тартылады

Астана қаласының әкімі Жеңіс Қасымбек Instagram парақшасында Шұбар ауданының тұрғындарымен кездсуде жүйелі проблемалар қозғалғанын мәлім етті,деп хабарлайды BAQ.KZ елорда әкімдігінің ресми сайтына сілтеме жасап.

Шұбар шағын ауданының тұрғындарымен кездестім. Мұнда 4 мыңға тарта адам тұрады. Кездесу барысында шағын аудан тұрғындары бірқатар түйткілді проблемаларды көтерді. Жүйелі мәселелер: су құбыры, кәріз желілерін салу, газдандыру жүргізу. Сол сияқты шағын ауданды абаттандыру, бағдаршамдар орнату, қолжетімділік аясында әлеуметтік нысандар салу, заңсыз тамақтану орындары және т.б. мәселелер көтерілді, - деп жазды елорда әкімі

Сондай-ақ ол су құбыры және тұрмыстық кәріз желілері бойынша жобалау жұмысы жүріп жатқанын, сараптамадан шыққаннан кейін желілер құрылысы басталатынын айтты.

Газдандыру – ауқымды және үлкен жұмысты қажет ететін процесс, қазір Шұбар шағын ауданы бойынша жобалау жұмысы жүріп жатыр. Биыл жеткізуші газ құбырының құрылысы басталады. Ал кварталішілік желілердің құрылысын келесі жылы бастаймыз, осының арқасында шағын аудан тұрғындары үйлерін көгілдір отынға қоса алады. Осыған дейін Алматы мен Сарыарқа аудандарының тұрғындарына газға қосылу мүмкіндігі жасалған.

Аудандардың, елді мекендердің тұрғындарымен тұрақты кездесу өткіземін. Кездесу қорытындысы бойынша тиісті жұмыстарды орындау кестесін жасаймыз», — деп жазды елорда әкімі.