Шектеусіз арман: мүмкіндігі шектеулі кәсіпкердің табысқа жету жолы

Бүгінгі таңда мемлекет мүмкіндігі шектеулі азаматтардың қоғамға толыққанды араласуына, өз ісін ашып, табыс табуына барынша жағдай жасап отыр. Еңбек және халықты әлеуметтік қорғау министрлігі мен "Атамекен" Ұлттық кәсіпкерлер палатасының бірлескен жобалары аясында мүгедектігі бар жандар бизнес негіздерін меңгеріп, қайтарымсыз гранттарға, жеңілдетілген несиелерге және түрлі оқыту курстарына қол жеткізе алады.

Әсіресе, "Бастау Бизнес", "Кәсіпкерлік негіздері" секілді бағдарламалар арқылы мыңдаған азамат кәсіби білім алып, тігіншілік, қолөнер, тамақтандыру, сұлулық салоны, IT сынды бағыттарда жеке ісін бастап жатыр. Бұл – әлеуметтік қолдаудың нақты нәтижесі.

Солардың бірі – Тараз қаласының тұрғыны, шағын ателье иесі Нұржамал Әміралиева. Еңбегі мен табандылығының арқасында ол өз ісін бастап қана қоймай, бүгінгі таңда қызымен бірге отбасылық кәсіпті дөңгелетіп отыр. Оның тарихы – тек табыстың емес, өмірге деген сенімнің үлгісі. BAQ.KZ тілшісі мүмкіндігі шектеулі болса да, кәсібін дөңгелетіп отырған Нұржамал ханыммен тілдескен еді.

Кәсіптің алғашқы қадамдары: арманнан нақты іске

Нұржамал Әміралиева – ерекше жан. Ол бала кезінен бастап тігін тігуді жақсы көрген. Қолына ине мен жіп ұстағанда өмірдің қиындығы ұмытылып, шабыт пен шексіз мүмкіндіктерге толы әлемге енгендей күй кешетін. Бірақ тағдыр оны ерте сынап, жол апатынан кейін, бір аяғына зақым келіп, 1-топ мүгедектігіне шықты. Көпшілік мұндай жағдайда үмітін үзетін еді, алайда Нұржамал ханым үшін бұл тек жаңа мүмкіндіктердің бастамасы болды.

Алдымен тігінді үйде отырып бастадым. Бұл менің кішкентай ғана әлемім еді — ине мен жіптің арасында өзімді табатын, өмірдің қиындықтарынан біраз болса да аулақ болатын кездерім. Алайда, кәсібімді нағыз әрі кәсіби деңгейде дамыту үшін бұдан артық қадам жасау керек екенін түсіндім. Сол себепті арнайы тігіншілік курсына жазылдым. Курс барысында қыз жасауын тігу, киімнің түрлі үлгілерін пішу және дәл өлшемге келтіру сияқты негізгі дағдыларды меңгердім. Сонымен қатар, заманауи тігін технологиялары мен құрал-жабдықтарды қолдануды үйрендім. Бұл білім мен тәжірибе маған кәсібімді сапалы әрі сенімді түрде жүргізуге жол ашты. Курстың арқасында алғашқы клиенттерімнің сеніміне ие болып, олардың талаптары мен тілектерін қанағаттандыруға мүмкіндік алдым. Әр тігетін киімім – менің кәсіби өсімім мен табысымның белгісі болды», – дейді Нұржамал ханым.

Нұржамал ханымның ательесі әуелде бір ғана бөлмеде болған. Кейін кәсібін дөңгелете келе жалға алған бөлмелер санын арттырып, қызмет түрін де көбейтті. Ательенің ішіне кірсеңіз, мейірім мен еңбектің иісі аңқып тұрады. Бір бұрышта – тігін машиналары, екінші жағында – маталар, фурнитуралар, ұлттық оюлар мен өрнектер. Мұнда тек киім емес, арман тігіледі.

Қазіргі таңда ательеміз негізінен күнделікті киімдер мен ұлттық нақыштағы көйлектер тігуге бағытталған. Біз тек сәнді әрі әдемі киімдер жасап қана қоймай, сонымен қатар әрбір клиенттің жеке талғамы мен қажеттіліктерін ескере отырып, олардың арманындағы киімдерді жасаймыз. Сонымен бірге, клиенттеріміздің киімдерін жөндеумен де белсенді айналысамыз. Бұл – шалбар қысқарту, киімнің тігісін дұрыстау, өлшемге дәл келтіру сияқты маңызды қызметтер. Көп адамдарға дәл осындай жұмыс керек, себебі сапалы, ыңғайлы әрі өзіне сай келетін киім кию – әркімнің арманы. Менің ойымша, халыққа ең қажеті – тек сәнді емес, сондай-ақ денеге сай, ыңғайлы киім. Сондықтан біз әр жұмысты ерекше жауапкершілікпен атқарамыз. Клиенттеріміздің разылығы – біздің ең басты табысымыз, – дейді кәсіпкер.

Кәсіп бастаған алғашқы кезең оңай болған жоқ. Қаржы тапшылығы – ең үлкен кедергілердің бірі болды. Қажетті құрал-жабдықтарды сатып алуға, жұмысқа лайықты орын жалдауға қаражат жетіспеді. Сонымен қатар, нарықтағы бәсекелестік пен клиенттерді тарту мәселелері де өзекті болды. Бұл қиындықтардың бәрі – кәсіптің алғашқы жылдарындағы сынақтар еді.

Дегенмен, Нұржамал ханым осы қиыншылықтарға мойымай, әрбір кедергіні сабырмен жеңе білді. Ол еңбек пен табандылықтың арқасында өз кәсібін бірте-бірте дөңгелетіп, бүгінгі деңгейге жеткізді. Оның бұл ерлігі – өз арманына жетудегі жігердің айқын көрінісі.

Мемлекеттік гранттарға алғаш рет қатысып көрдім. 2019 жылы «Бастау Бизнес» жобасы арқылы 500 мың теңге көлемінде қайтарымсыз грант ұтып алуым мен үшін үлкен жаңалық әрі мүмкіндіктің бастауы болды. Бұл қаражат кәсібімді кәсіби деңгейде дамытуға жол ашты. Осы қаржыға заманауи және сенімді кәсіби тігін машинасын сатып алдым, сондай-ақ қажетті құрал-жабдықтар мен материалдарды толықтырдым. Бұл менің жұмысымды сапалы әрі тиімді етуге мүмкіндік берді. Ең бастысы, осылайша мен кәсіпті ресми түрде тіркеп, заңды түрде жүргізе бастадым. Грант арқылы алған қолдауым менің кәсіби дамуыма үлкен серпін беріп, жаңа белестерді бағындыруға итермеледі, – дейді Нұржамал ханым.

Сонымен қатар, жергілікті әкімдік пен кәсіпкерлер палатасы тарапынан да моральдық әрі ақпараттық қолдау көрсетілген.

Нұржамал ханымның алға қойған мақсаттары да аз емес. Болашақта ательесін кеңейтіп, жанына тігінші қыздарды жинағысы келеді. Ең басты арманы – мүмкіндігі шектеулі қыз-келіншектерге тігін ісін үйретіп, оларға да табыс табуға мүмкіндік беру.

Қолынан іс келетін, талантты және еңбекқор көп қыз-келіншектер бар, бірақ өмірдің түрлі қиындықтары салдарынан олар үйде қалып қойған. Осындай азаматтарға менің басты мақсатым – қолдау көрсету, бағыт-бағдар беру және кәсіптің қыр-сырын үйрету. Қарапайым тігін машинасымен де өз табысын тауып, отбасын асырауға, өмірде өз орнын табуға болатынын дәлелдегім келеді. Кәсіпкерлікке үлкен инвестициясыз-ақ, еңбек пен табандылық арқылы жақсы нәтижелерге жетуге болады. Мен олардың бойындағы сенімді оятып, өз-өздеріне деген сенімділік пен армандарын жүзеге асыруға көмектескім келеді, – дейді Нұржамал ханым.

Нұржамал Әміралиеваның өмір жолы – табандылықтың, еңбекқорлықтың және үміттің үлгісі. Ол "мүмкіндігі шектеулі" деген ұғымның шынайы өмірде адамды шектеуге емес, шыңдауға жетелейтінін дәлелдеп отыр. Оның ательесі – жай ғана тігін орны емес, бұл – арман мен сенім тоғысқан кеңістік.

Ана мен қыз: кәсіп пен өнердің үйлесімі

Нұржамал ханым бүгінде жалғыз жұмыс істемейді. Қазір ол өзімен бірге туған қызы – Назеркені де тігін ісіне баулып, шеберханада бірге жұмыс істеп жүр. Бұл – тек кәсіп емес, ана мен қыз арасындағы рухани байланысқа негізделген ерекше серіктестік.

Назерке кішкентай кезінен менің жанымда жүріп, ине мен жіптің, мата мен өрнектің сырын бойына сіңіріп өсті. Кейде сабақтан келген соң жаныма отырып, жіп түтікке өткізуді өзі сұрайтын. Қазір енді менің оң қолым десе болады. Жаңа үлгілер ұсынады, жастарға лайық сәнді көйлектер тігеді, – дейді Нұржамал ханым мейіріммен.

Назерке – анасының жалғасы іспетті. Ол тігінге тек кәсіп ретінде емес, өнер ретінде қарайды. Қазіргі заман талабына сай дизайн, түстер үйлесімі мен сән үлгілеріне қызығады. Осылайша, ананың шеберлігі мен қыздың жаңашылдығы үйлесіп, ателье жұмысы жандана түскен.

Анама қарап өскендіктен, еңбектің, табандылықтың және шыдамдылықтың мәнін терең түсіндім. Біз бірге отырып, мата таңдап, жаңа үлгілер пішкен сәттер – мен үшін өмірдегі ең жылы әрі ұмытылмас естеліктер болып қалды. Қиындықтарға қарамастан, анамның жігерімен шабыттанып, осы істі бірге дөңгелетіп отырғанымыз – мен үшін үлкен мақтаныш әрі жауапкершілік. Әрбір тігін жолы мен үлгі – біздің отбасы мен дәстүріміздің жалғасы. Бұл кәсіп бізді одан әрі жақындастырып, шығармашылығымызға қанат бітірді, – дейді Назерке.

Ананың аманаты мен қызының ынтасы тоғысқан бұл шағын шеберхана – шын мәнінде үлкен армандардың мекені. Мұнда шеберліктен бөлек, ұрпақ сабақтастығы, отбасы құндылығы, еңбекке деген құрмет тоғысып жатыр.

Мемлекет тарапынан берілетін гранттар, әсіресе әлеуметтік осал топтарға ерекше қолдау болып табылады. Бұл қаржылық қолдау өз ісін бастауға, кәсіби дағдыларды дамытуға және өмірлік қиындықтарды жеңуге үлкен мүмкіндік береді.

Нұржамал ханымның өмір жолы – осындай гранттардың тиімділігінің айқын дәлелі. Ол қарапайым қыз жасауын тігуден бастап, қазіргі таңда кәсіби деңгейде танылған, көпшілікке сыйлы тігіншіге айналды. Оның табысы – жеке адамның ғана емес, бүкіл қоғамның, мемлекет пен оның әлеуметтік саясатының жеңісі.

Осындай мысалдар арқылы әлеуметтік бағдарламалардың халықтың тұрмысын жақсартудағы рөлі мен маңыздылығы көрініс табады.