Шекарадан 1,5 келі алтынмен өтпек болған шымкенттік ұсталды

Шымкент әуежайында Ыстанбұлға 1,5 келі алтынмен ұшып кетпекші болған қала тұрғыны ұсталды, деп хабарлайды BAQ.KZ мемлекеттік кірістер комитетіне сілтеме жасап.

Ресми мәліметке сәйкес, 4 мамырда кешкі сағат 18:10 шамасында кеденшілер "Шымкент-Ыстанбұл" әуе рейсіне тексерген. Сол кезде заңсыз қымбат металды шетелге әкетудің жолы кесілді. Осы қылмыс үшін Қазақстан азаматы ұсталды.

Алтын құймалардың жалпы салмағы 1,434 кг (бір килограмм төрт жүз отыз төрт грамм). Ұлттық банктің ресми бағамы бойынша тауардың алдын ала құны -41 148 000 теңгені құрайды, - делінген ресми хабарламада.

Қазіргі кезде Қылмыстық кодекстің 234-бабы, 1-бөлігі (Экономикалық контрабанда) бойынша сотқа дейінгі тергеу шаралары басталды. Осы қылмыс үшін 80 айлық есептiк көрсеткiшке (276 000 теңге) дейiнгi айыппұл не сол мөлшерде түзеу жұмыстары немесе 80 сағатқа дейінгі мерзімге қоғамдық жұмыстар, я болмаса, 20 тәулікке дейінгі мерзімге қамаққа алу жазасы қарастырылған. Кінәлі адамның мүлкі тәркіленуі мүмкін.