Сенаттың кезекті отырысының күн тәртібі бекітілді

Парламент Сенаты Бюросының мүшелері 2022 жылдың 6 қазанына жоспарланған Палата отырысының күн тәртібін бекітті, деп хабарлайды BAQ.KZ.

Палата отырысында «2018 жылғы 17 мамырдағы Бір тараптан Еуразиялық экономикалық одақ пен оған мүше мемлекеттер және екінші тараптан Иран Ислам Республикасы арасындағы еркін сауда аймағын құруға алып келетін уақытша келісімге хаттаманы ратификациялау туралы» заң жобасы қаралатын болады.

Келісім ЕАЭО елдері мен Иран арасындағы тауар саудасын еркінсітуге және жеңілдетуге бағытталған. Заң жобасы осылайша тараптар арасындағы экономикалық және сауда өзара іс-қимылын қолдауға бағытталған. 

Уақытша келісімнің қолданылу мерзімін ұзарту да сауданың бажсыз тәртібін және отандық тауарлардың Иран нарығына шығуы үшін қолайлы жағдайларды сақтауға мүмкіндік береді.

Депутаттар сондай-ақ «Жаһандық жасыл өсу институтын құру туралы келісімді ратификациялау туралы» заң жобасын қарайтын болды. 

Қазақстан Республикасының Келісімге қосылуы экономикалық өсудің жаңа үлгісін – экономикалық көрсеткіштер мен экологиялық тұрақтылыққа бағдарланған «жасыл өсуді» әзірлеу және тарату, сондай-ақ жасыл өсуді ілгерілетумен айналысатын халықаралық ұйымдармен және халықаралық институттармен ынтымақтастықтың қажеттігінен туындады.

Осы келісімді ратификациялау қандай да бір міндеттемелерді қабылдамай, техникалық көмек тарту мүмкіндігімен институттың сараптамалық әлеуетіне және жинақталған білім базасына қолжетімділікті ашады.

Бюро мүшелері отырыс барысында Мәжілістен келіп түскен заң жобаларын Сенаттың тұрақты комитеттері арасында бөліп берді.