Сенатор Жаңаөзендегі жұмыссыздық мәселесін көтерді

Нұр-Сұлтан, BAQ.KZ тілшісі. Сенатор Сүйіндік Алдашев бүгін өткен Сенат отырысында Үкімет басшысының атына депутаттық сауал жолдады. Ол Жаңаөзеннің «бас ауруына» айналған жұмыссыздық мәселесін көтерді. 

Сенатордың айтуынша, соңғы 10 жылда Жаңаөзенде ауқымды жұмыстар атқарылған. Әлеуметтік нысандар салынып, абаттандыру жұмыстары жүргізілді. Депутат қаланы тек мұнайға тәуелді етпей, оның даму бағыттарын әртараптандыруды, оның ішінде ауыл шаруашылығын, туризм саласын дамытуды, көлік-логистика әлеуетін күшейтуді ұсынды. 

Бірақ моноқалалардың саны үнемі өсе түскендіктен жұмыссыздық мәселесі өткір күйінде қалып отыр.

Еліміздің тәуелсіздік алған 30 жылда Жаңаөзен қаласының тұрғындары 60 мың адамнан 160 мың адамнан асты және  жыл сайын 3500 адамға өсіп отыр, - деп атап өтті депутат.

Сонымен қатар ол мәселенің екінші жағына тоқталды. Кен орнында жылына 5,3-5,5 млн тонна мұнай өндіріледі. Мамандардың мәліметтері бойынша алуға болатын мұнай қоры шамамен 150 млн тоннаны құрайды. Бұл қор 30-35 жылға есептелген. Депутаттың пікірінше, бұл уақытты барынша тиімді пайдалану керек. Өйткені Жаңаөзен моноқала ретінде өз мүмкіндіктерін пайдалана алмай отыр. Депутат осыған байланысты аталған мәселенің бірқатар шешімдерін ұсынды.

Кен орындарына қажет құрал жабдықтардың, материалдардың тізімін жасап қайсы бірін жергілікті шағын, орта кәсіпкерлеріне тікелей тапсырыспен көпжылдық мерзімге беру керек. Қала аумағына «Ерекше аумақ» статусын беру мүмкіндігін қарастыру, қажет болса «ӨзенМұнайГаз» АҚ жарғысына өзгеріс енгізуді қарастыру керек, - деді Сүйіндік Алдашев.