Семейге қарасты екі ауылға таза ауыз су беріледі

Алғабас пен Ақбұлақ ауылдарына таза ауыз су құбырлары тартылуда, деп хабарлайды BAQ.KZ.

Қалалық әкімдіктің баспасөз қызметінің мәліметінше, Семей қаласына қарасты ауылдардың инфрақұрылымдық әлеуетін жақсартыға биыл қалалық бюджеттен былтырғы жылмен салыстырғанда 1,5 есе көп қаржы қарастырылды. 

Соның ішінде Ақбұлақ, Алғабас ауылында көп жылдан бері шешілмей келе жатқан ең өзекті мәселе - таза ауыз су. 

Қазіргі таңда Ақбұлақ ауылына су құбырларын жүргізу жұмыстарына Республикалық бюджет есебінен қаражат бөлініп, «СпецСтрой груп ЛТД» мердігер ұйымы жалпы ұзындығы 10 шақырым су құбырын тарту жұмыстарын жүзеге асыруда. Күз маусымында су құбырларын тарту жұмыстары толық аяқталып, тұрғындардың игілігіне беріледі. Сондай-ақ, дәл осындай жұмыстар Семей қаласынан ең шалғай қашықтықта орналасқан Алғабас ауылдық округінде де ауыз су құбырын тарту жұмыстары жүргізілуде. Ағымдағы жылы ауыл тұрғындарын таза ауыз сумен қамтамасыз ету үшін СМУ «Шығыс» мердігер ұйымы 16 шақырым су құбырын тарту жұмыстарын бастады. Биыл құбыр желілері тартылып, 2024 жылы Алғабас ауылы таза сумен қамтамасыз етілетін болады, - делінген әкімдік таратқан ақпаратта.

Айта кетейік, қала әкімі Нұрбол Нұрсағатов Абыралы өңіріне барған жұмыс сапарында мердігерлермен кездесіп, жұмысты тиянақты орындауды тапсырған болатын. 

Қазір таза ауыз су құбырларын тарту жұмыстары қала әкімінің тікелей бақылауында. 2023 жылы Семейге қарасты кенттер мен ауылдардың инфрақұрылымын жақсарту үшін бюджет бір жарым есе ұлғайтылды. 

Су құбырын салудан басқа, басқа кенттерде сыртқы жарықтандыру орнатылады, Спорт және воркаут алаңдары абаттандырылады, әлеуметтік нысандар жөнделеді және т. б.