Семейде полицейлер итті асып өлтірген күдіктінің жеке басын анықтады

Семей қаласының тәртіп сақшылары жануарға қатыгездік көрсеткен адамның жеке басын анықтады. Бұған дейін хабарланғандай, 12 сәуір күні сағат 09:00 шамасында Красный Пильщик пен Қабылбаев көшелерінің қиылысында, Силикат зауытының маңында өтіп бара жатқан тұрғындар ағаштардың арасынан шынжырға асылып қалған иттің өлексесін тауып алған болатын, деп хабарлайды BAQ.KZ Аlashtimes.kz-ке сілтеме жасап.

Аталған оқиғаға байланысты полиция бөлімі ҚР Қылмыстық кодексінің 316-бабы 2-бөлігіне сәйкес ("жануардың өліміне әкеп соққан қатыгездік") сотқа дейінгі тергеуді бастады.

Полиция департаментінің баспасөз қызметі тергеу барысында иттің иесі 67 жастағы әйел адам екені анықталғанын мәлімдеді. Ол жасаған іс-әрекетін толықтай мойындаған. Қазіргі таңда оқиғаға қатысты бірнеше сот сараптамасы тағайындалды.

Көршілерінің айтуынша, аталған азаматша психоневрологиялық диспансерде есепте тұрады. Алайда, бұл ақпарат әзірге ресми түрде расталмаған. Полиция қызметкерлері ҚР ҚПК-нің 201-бабына сілтеме жасап, тергеу деректерінің жария етілмейтінін атап өтті.

Кешенді тергеу нәтижесінде облыс орталығы тұрғынының әрекетіне заң шеңберінде тиісті баға беріледі, - деп хабарлады полиция департаменті.