Сайлау тікелей эфирде: Қазақстанда 16 сағаттық онлайн-марафон өтіп жатыр
Бүгін, 23 тамызда, Қазақстан тарихындағы алғашқы Құрылтай депутаттарын сайлаумен қатар жалпыұлттық онлайн-марафон басталды. Ауқымды медиажоба елдегі және шетелдегі дауыс беру барысын қамтып, сонымен бірге қоғамдағы өзекті мәселелерді талқылайтын алаңға айналады.
Тікелей эфир сағат 09:00-де басталып, 00:30-ға дейін жалғасады. 16 сағатқа жуық уақыт бойы көрермендер сайлау туралы жедел ақпаратты, тікелей қосылымдарды, арнайы репортаждарды, пікірталастарды және сарапшылардың сөздерін көре алады.
Марафонға қоғам қайраткерлері, сарапшылар мен түрлі саланың мамандары, БАҚ өкілдері, блогерлер, спортшылар, белсенділер, сондай-ақ шығармашылық және креативті индустрия өкілдері қатысады.
Қазақстандағы және шетелдегі сайлау – тікелей эфирде
Марафонның негізгі бағыттарының бірі – сайлау барысын көрсету. Қазақстанның барлық өңірінен, сондай-ақ АҚШ, Ресей, Түркия, Қытай және Бельгиядан тікелей қосылымдар ұйымдастырылған. Әр екі сағат сайын эфирде шетелдегі қазақстандықтардың дауыс беруі туралы өзекті ақпарат беріліп отырады.
Сайлау барысы туралы ресми мәліметтер Орталық сайлау комиссиясының алаңынан беріледі. Сонымен қатар күні бойы Орталық коммуникациялар қызметінде халықаралық байқаушылар сөз сөйлейді.
Touch Screen интерактивті жүйесі арқылы көрермендерге Қазақстан туралы статистикалық мәліметтер және еліміздің түрлі халықаралық рейтингтердегі орны көрсетіледі.
Қоғамдық пікірталастардан арнайы репортаждарға дейін
Марафон бағдарламасы тек сайлау тақырыбымен шектелмейді. Негізгі алаңда сарапшылар мен қоғам қайраткерлері әлеуметтік, экономикалық, қоғамдық-саяси және тарихи-мәдени тақырыптарды талқылайды.
Өз саласында жетістікке жеткен азаматтардың қысқаша сөз сөйлеуіне де арнайы формат қарастырылған. Олар бес-жеті минут ішінде өз тәжірибесін айтып, пайдалы әрі тәжірибеде қолдануға болатын ойларымен бөліседі.
«Экспресс-камера» форматында азаматтардың пікірлері жиналып, қысқаша сұхбаттар жүргізіледі. Бағдарламада викториналар мен басқа да интерактивті форматтар бар.
Тағы бір бағыт – «Қарқынды құрылыс» жобасы. Тілшілер еліміздің әр өңірінде салынып жатқан ірі нысандарды көрсетіп, жобалардың жүзеге асырылу барысы туралы баяндайды.
Астана, Алматы және Шымкенттен де тікелей қосылымдар жоспарланған. Көрермендерге сайлау күні еліміздің ірі қалаларындағы тыныс-тіршілік көрсетіліп, тұрғындармен және түрлі сала өкілдерімен сұхбаттар ұсынылады.
Эфир барысында Қазақстанда жүргізіліп жатқан реформалар, мемлекетке қайтарылған активтердің пайдаланылуы, жаңа заң нормаларының іс жүзінде қалай жұмыс істеп жатқаны және цифрлық қауіпсіздік мәселелері де талқыланады.
Жалпыұлттық онлайн-марафон республикалық және өңірлік медиаресурстардың сайттары мен парақшаларында көрсетіліп жатыр. Тікелей эфир 38 YouTube-арна мен ақпараттық алаңда қолжетімді.
Жалпыұлттық онлайн-марафонның тікелей эфирін BAQ.kz YouTube-арнасынан көре аласыздар.