Сауалнама: Сіз өз құқығыңызды білесіз бе?

Алматы облысы Жамбыл ауданы Ұзынағаш ауылында Конституция күніне орай One Stop Service "Бір қадам" орталығының мамандары халық арасында сауалнама жүргізді. Іс-шараны орталықтың үйлестірушісі, заңгер Ләззат Рақышева мен Human Rights Lawyers қоғамдық қорының еріктілері жүзеге асырған, деп хабарлайды BAQ.KZ тілшісі.

Сауалнамаға қатысқан 100 адамның 68,2%-ы өз құқықтарын білетінін, ал 31,8%-ы жартылай білетінін айтқан. Респонденттердің пікірі бойынша, балалардың құқығын қорғауда ең басты рөлді ата-ананың жауапкершілігі (41,5%) атқарады. Сонымен қатар мектеп пен балабақша сияқты білім беру мекемелерінің рөлі (35,2%) мен ата-аналарға арналған ақпараттардың жеткіліксіздігі (23,3%) де маңызды фактор ретінде аталды.

Сауалнама қорытындысы қоғамда құқықтық білімді арттыру қажеттігін көрсетті. Халықтың 64,8%-ы азаматтарға тегін құқықтық және психологиялық кеңестер қажет деп санайды. Ал 35,2%-ы мектептер мен оқу орындарында құқықтық сабақтар көбейтілуі тиіс десе, әлеуметтік бейнероликтерге сұраныс болмаған.

Айта кетейік, тұрғындардың жартысына жуығы (49,3%) құқықтық ақпаратты әлеуметтік желіден алатынын айтқан, ал 32,6%-ы бұқаралық ақпарат құралдарын пайдаланатынын көрсеткен.

Сауалнама кезінде кейбір азаматтар зорлық-зомбылық құрбаны болған балаларға тегін көмек көрсететін орталықтардың бар екенін білмейтінін айтқан. Осыған байланысты ақпараттандыру жұмыстарын күшейту қажеттілігі туындап отыр. Осы орайда ұйымдастырушылар орталық қызметі туралы жан-жақты түсіндіру жұмыстарын жүргізіп, 111 жедел желісі туралы ақпаратпен де бөлісті, - дейді заңгер Рақышева.

Жоба ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның, Мәдениет және ақпарат министрлігі мен Әділет министрлігінің, сондай-ақ "Азаматтық бастамаларды қолдау орталығы" КеАҚ-ның қолдауымен жүзеге асырылып отыр.