«Саламатты Қазақстан» пойызы 15 мыңға жуық халыққа көмек көрсетті

«Саламатты Қазақстан» медициналық пойызы Алматы, Жетісу және Абай облыстарынан соң Ертіс өңіріне келіп жетті, деп хабарлайды BAQ.KZ агенттігінің Павлодардағы тілшісі.

Бүгін вагон-емхананың білікті мамандары Павлодардың іргесіндегі Кемеңгер ауылының тұрғындарына қызмет көрсетіп жатыр. Пойыздың бас дәрігері Айнұр Егінбаеваның айтуынша, ауыл халқы тарапынан ультрадыбыстық зерттеу жүргізу, тіс, көз дәрігері мен невропотолог-мамандарға сұраныс жоғары.

Жұмысымыз қарқынды жүріп жатыр. Біз өз сапарымызды 26-шы сәуірде бастадық. Осы уақыт аралығында үш өңірде болдық. Кемеңгер станциясында екі күн тұрамыз. Халық тегін қарала алады. Невропотолог, окулист, хирург, уролог, акушер-гинеколог, стоматолог, кардиолог мамандары жұмыс істейді. Сонымен қатар, зертханамыз быр. Тұрғындар қан тапсырады. Флюрографиялық аппарат та іске қосылған. Жалпы, сәуірден бастам 15-мыңға жуық халықты қабылдадық. Олардың 15%-ы – кішкентай пациенттер, - дейді Айнұр Егінбаева.

«Саламатты Қазақстан» пойызы облыстың сегіз ауылында болады. Биылғы жылдың жаңашылдығы – дәрігерлермен қатар кәсіби заңгерлер мен медиаторлардың жұмысы. Ауылдағы ағайын кез келген құқықтық мәселесі бойынша көмекке жүгіне алады. Ал мамандар өтініш-тілектердің барлығын жинап, «Е-өтініш» бағдарламасына енгізеді. Бұл тәжірибені енгізуге ҚР Президенті жанындағы отбасы және әйелдер ісі жөніндегі кеңес мүшелері мұрындық болған.