Рекордтық су тасқыны: 3 адам қаза тауып, 1 адам із-түзсіз жоғалды

Аустралияның Жаңа Оңтүстік Уэльс штатында жауған рекордтық нөсер салдарынан кемінде үш адам қаза тауып, бір адам жоғалып кетті, ал 50 мыңнан астам тұрғын эвакуация қаупі алдында қалды, деп хабарлайды BAQ.KZ тілшісі ВВС агенттігіне сілтеме жасап.

Табиғи апат ретінде жарияланған бұл су тасқыны аймақтың тарихындағы ең күшті тасқындардың бірі ретінде тіркелді.

Құтқару жұмыстарына 2000-нан астам маман тартылып, түн ішінде шатырларға шығып қалған адамдарды құтқару шаралары жүргізілді. 22 адам тікұшақпен құтқарылды, оның ішінде төрт үй жануары да бар.

100-ден аса мектеп жабылып, мыңдаған үй мен бизнес жарықсыз қалды. Тұрғындар үшін эвакуациялық орталықтар ашылды.

Қаза тапқандардың арасында:

• 63 жастағы ер адам — Тари маңында табылды;
• 30 жастағы ер адам — Розвудта көлікпен жүрген кезінде су астында қалып қойған;
• 60 жастағы әйел — Кофс-Харбор маңындағы Брукленде көз жұмды;
• 49 жастағы ер адам — Нимбоиде іздестірілуде.

Жаңбыр алдағы күндері де тоқтамайды: кейбір өңірлерде 300 мм жауын-шашын күтілуде. Штат билігі тұрғындарды ертерек эвакуациялануға шақырып отыр, өйткені шалғай ауылдарға азық-түлік пен көмек жеткізу қиындап кеткен.

Біз әлі де қиын жағдайдан толық шыға қойған жоқпыз. Қосымша жауын жауып, ахуал ушығуы мүмкін, – деді Жаңа Оңтүстік Уэльс премьер-министрі Крис Миннс.