Әрбір адам үшін күресуіміз керек – Димаш Құдайберген

Нұр-Сұлтан, BAQ.KZ. Әнші Димаш Құдайберген Жалпыұлттық аза тұту күніне орай Instagram-парақшасында пікір білдірді.

Өкінішке қарай, күллі әлемді шарпыған пандемия Қазақстанды да айналып өтпеді. Қаншама отбасы қара жамылды. Күн сайын мен танитын, танымайтын қаншама адам өмірден өтіп жатыр. Бұл неткен қасірет еді... Қазір жүрегі бар адамның тыныш ұйықтауы мүмкін емес... - деп жазды әнші.

Димаш өз сөзінде коронавирус індетінен көз жұмған марқұмдардың туған-туыстарына сабыр тіледі.

Бүгін - Аза тұту күні! Осы індеттің кесірінен қайтыс болған барлық адамды Жаратушы Иеміз панасына алғай! Марқұмдардың туған-туыстарына сабыр тілеймін. Біз оларды, мына қаралы күндерді ешқашан ұмытпаймыз. Қазіргі міндет – ауырып жатқандарды аман алып қалу. Әрбір адам үшін күресуіміз керек. Бәріміз осы ұлы мұрат жолында жұмылуымыз қажет. Тезірек індет аяқталып, мамыражай күндеріміз қайта келеді деп сенемін. Ендігі жерде Көк Байрағымыз еңкеймегей!, – дейді әнші.