Қызылордада тұрғын үй өртеніп, 10 адам құтқарылды

Нұр-Сұлтан, BAQ.KZ. ​Өрт кезінде 7 адам эвакуацияланып, 10 адам құтқарылды. Бұл туралы Қызылорда облысы ТЖД баспасөз қызметі хабарлады.

Биыл 23 маусымда сағат 11.15-те Қызылорда облысы ТЖД кезекші қызметіне Қызылорда қаласы Шұғыла шағын ауданы 7 "А" мекенжайы бойынша бес қабатты тұрғын үйдегі өрт туралы хабарлама келіп түсті. Өрт сөндірушілер келген бойда үшінші қабатта қысқатолқынды пеш, тоңазытқыш, кір жуғыш машинасы жанып жатқанын анықтады.

Өрт сөндірушілер баспалдақ маршы арқылы 7 адамды, оның ішінде 2 баланы эвакуациялады. Сонымен қатар, 4-қабаттан өрт автосатысы арқылы 10 адам, оның ішінде 5 бала құтқарылды. Өрт сағат 11.34-те ауыздықталды.

Апаттар медицинасы орталығы мен жедел жәрдем бригадалары оқиға орнынан улы газбен уланудың жеңіл түрдегі белгілері бар 6 адамды, оның ішінде 4 баланы облыстық медициналық орталыққа және облыстық балалар ауруханасына жеткізді. Қаза болғандар жоқ. Өрт ауданы 10,5 шаршы метрді құрады, - делінген ТЖД хабарламасында.

Өртті сөндіруге және алғашқы медициналық көмек көрсетуге Апаттар медицинасы орталығының, Қызылорда облысы Төтенше жағдайлар департаментінің, Полиция департаментінің, жедел медициналық жәрдемнің, "ҚазТрансГазАймақ" АҚ, "Қызылорда электр тарату торабы" АҚ жеке құрамынан 28 адам және 9 техника жұмылдырылды.