Қызылордада IQ-ORDA республикалық интеллектуалды байқауы өтті

Қызылордада жаһандану заманында бәсекеге қабілетті, ұшқыр ойлы, интеллектуалды ұлт тәрбиелеу мақсатында IQ-ORDA республикалық интеллектуалды байқауы өткізілді, деп хабаралайды BAQ.KZ.

Байқауға облыс әкімінің орынбасары Сақтағанов Нұрымбет Аманұлы арнайы қатысып, шараны ашып берді.

Өздеріңіз білесіздер, мемлекет жастардың білім-білігін көтеру, бағыт-бағдар беру мен жаңа бастамаларға қолдау білдіруді ешқашан назардан тыс қалдырған емес. Үкіметке, жергілікті атқару органдарына ұдайы тиісті тапсырмалар беріліп, жастар саясатын жүргізуге тұрақты көңіл бөліп келеді. XXI ғасыр білімнің, интеллектуалды адам капиталының заманы. Жастарға қай заманда да көп үміт артылған, артыла да бермек. Еліміздің барлық интеллектуал, эрудит жастарына бүгінгі сайыста сәттілік тілеймін, – дейді Нұрымбет Аманұлы.

Сайыста Атырау, Ақтөбе, Жетісу, Шығыс Қазақстан облыстарынан, Алматы қаласы мен Қызылорда қаласы және барлық ауданнан келген үздік 20 команда өзара сынға түсті.

Бес кезеңнен тұратын сайыста командалар қазақ және әлем әдебиеті, Тәуелсіз Қазақстан тарихы, логикалық, кино және музыка тақырыптары бойынша арнайы дайындалған сұрақтарға жауап берді.

Сайыстың жүлделі I орнын Қазалы ауданынан келген "Қазалы" командасы (500 000 тг), II орынды Жалағаш ауданының "J-Team" командасы (300 000 тг), III орынды Алматы қаласынан келген "Әл-Фараби" командалары (200 000 тг) иеленді. Арнайы номинациялар (50 000 тг) "Бейбарыс сұлтан ұрпақтары" Атырау облысы, "Намысты елдің ұрпақтарымыз" Ақтөбе облысы, "7SU TEAM" Жетісу облысы, "Алаш Орда" Шығыс Қазақстан облыстарының және Қармақшы ауданының "Qadam" командасы мен Қызылорда қаласының №235 мектеп құрамасы "Көмекбай жастары" командаларына бұйырды.