Қосымша құн салығы кімдерге қосылмайды? – Аймағамбетов мәлімдеме жасады

Мәжіліс депутаты Асхат Аймағамбетов қандай салаларға қосымша құн салығы қосылмайтынын айтты, деп хабарлайды BAQ.KZ тілшісі.

Мәжіліс депутаты "Неге дәрі-дәрмекке, емделуге, кітаптарға және карталар арасындағы аударымдарға ҚҚС 0% мөлшерлемесі ұсынылды?" деген сауалға жауап берді.

Мен салық кодексіне депутаттар тобы енгізген түзетулер туралы жазған посттан кейін көп сұрақтар түсті. Әсіресе - дәрі-дәрмек, медициналық қызметтер, кітаптар мен картадан картаға аударымдар неге ҚҚС-тан босатылуы керек деген сұрақтар көп болды. Біз қазіргі қолданыстағы нөлдік ҚҚС мөлшерлемесін сақтауымыз керек деп ұсынып отырмыз. Әсіресе ауыр, созылмалы және өмірге қауіп төндіретін аурулар кезінде - онкология, диабет, аутоиммунды және сирек кездесетін көптеген ауруларға қатысты, - дейді Аймағамбетов.

Депутаттың сөзінше, келген салықтың өсуі бағаның өсуіне тең.

Ал дәрі-дәрмек бағасының өсуі – ең әлсіздерге, яғни науқастар мен олардың отбасыларына ауыр соққы. Бұл тек әлеуметтік шара емес - бұл этикалық таңдау. Өмірлік маңызды емнің салық салдарынан қолжетімсіз болуына жол беруге болмайды. Онкологияға қарсы дәрілер немесе сирек ауруларға арналған препараттар онсыз да қымбат. Ал 16% ҚҚС енгізу - бағаның күрт өсуіне әкеледі, - дейді Асхат Қанатұлы.

Кітаптар мен анимация

Кітапқа ҚҚС салу отандық авторлардың өнімін қымбаттатуына әкеледі.

Біз бір жағынан балалардың аз оқитынын айтып, қазақ әдебиетін насихаттауды қажет дейміз, ал екінші жағынан – ҚҚС арқылы оның бағасын өсіріп жатырмыз. Бұл – қисынсыз, - дейді депутат.

Ол қазақстандық авторларды, аудармашыларды, суретшілерді қолдау керегін айтады.

Бұл - әсіресе қазір енді дамып келе жатқан қазақ тіліндегі анимацияға да қатысты. Бұл салаға салық емес, қолдау керек, - дейді Асхат Аймағамбетов.

Қаржылық қызметтер

Көп адам білмейді: бірақ көптеген елдерде қаржылық қызметтерге ҚҚС салынбайды - бұл кездейсоқ емес. Бізде де қазіргі таңда ҚҚС салынбайды.

Егер банктік аударымдарға, карталар мен зейнетақы операцияларына ҚҚС енгізілсе - бұл барлық азаматтар үшін негізгі қызметтерді қымбаттатады.

Мысалы, Халық банктен Kaspi-ге ақша жіберсеңіз - шамамен 200 теңге комиссия төлейсіз. ҚҚС қосылса - үстіне тағы 32 теңге қосылуы мүмкін. Комиссия өседі. Әсіресе жиі аударатындарға ауыр тиеді. Зиян шегетіндер: зейнеткерлер, студенттер, ата-аналар, шағын бизнес. Біз нысаналы, сараланған тәсілді ұсынамыз, - деп жазды Аймағамбетов.

Дәрі-дәрмек сатып алу мен казиноға бәс тігуге бірдей салық салуға болмайды.

Сондықтан біз ұсынып отырмыз:

– букмекерлік кеңселер мен казиноларға салықты көтеру,
– трансмайларға акциз енгізу,
– банктерге салынатын КТС-ті (корпоративтік табыс салығы) көбейту және ірі компаниялар үшін негізсіз жеңілдіктерді алып тастау.

Мәселе “бәрін барлығынан босату” емес. Мәселе - ақылға қонымды, әділетті және теңгерімді салық саясаты жүргізуде. Бұл - Мемлекет басшысының талабы, - деп түйіндеді Асхат Аймағамбетов.

Ол қазір талқылау жүріп жатқанын атап өтті.