Қостанайдан оралған елордалық  өрт сөндірушілерді  қарсы алды

Елордалық гарнизонның басшылығы мен жеке құрамы Өрт сөндіру қызметі бастығының орынбасары Р.Екишевтің басшылық етуімен Қостанай облысында болған орман өртімен бес тәулік күрескен өрт сөндірушілерді қарсы алды,  деп хабарлайды BAQ.KZ.

Сіздер жеңіспен оралған нағыз батырсыздар, осы орайда сіздерге алғысымды білдіремін! Сіздер атқарған жұмысты, орындалған міндетті Мемлекет басшысы жоғары бағалады,-деп атап өтті Нұр-Сұлтан қ. ТЖД бастығы полковник Қуанар Базарбаев.

Естеріңізге салсақ, Қостанай облысында алапат өртті сөндіруге елордалық 98 өрт сөндіруші 18 өрт сөндіру көлігі көмекке барған. Елге төнген қауіпке дер кезінде жеткен өрт сөндірушілер отан алдындағы міндетін абыройлы атқарып, бесінші күні өз жақындарымен қауышты.

Біз өз әріптестерімізге, елімізге қиын қыстау кезде барып, тілсіз жаумен күні түні күрестік,  бірлескен әрекеттердің арқасында оттың ары қарай басқа да ауылдарға таралуына жол бермедік, бүгін міне өз үйімізге шаршап жетсекте,  елге қызмет етіп, қойылған міндетті абыроймен атқарғанымыз, жеңіске жеткеніміз бізге үлкен күш-қуат береді,- дейді Қостанай облысынан келген өрт сөндірушілердің бірі.