Қостанай әуежайы сағатына 250 жолаушы қабылдайтын болады

Қостанайда Ахмет Байтұрсынов атындағы әуежайды қайта жаңарту жұмыстары жалғасып жатыр, деп хабарлайды BAQ.KZ Көлік министрлігінің баспасөз қызметіне сілтеме жасап.

Биылдың 9 айында әуежай 251 мыңнан астам жолаушыға қызмет көрсетті. Бүгінгі таңда Қостанайдан Астана мен Алматы қалаларына 19 ішкі рейс жүзеге асырылады.

Өткізу қабілетін сағатына 200 жолаушыдан 250 жолаушыға дейін арттыру және қызмет көрсету сапасын жақсарту үшін әуе айлағында аэровокзал ғимаратын қайта құру басталды. Сондай-ақ аэровокзал алаңын 5,2-ден 8,7 мың шаршы метрге дейін ұлғайту көзделген, - делінген хабарламада.

Негізгі келу залы бойынша жұмыстар аяқталған, сонымен бірге ішкі әрлеу, техникалық жабдықтарды монтаждау және ұшу залының лифт жабдықтарын орнату бойынша жұмыстар жүргізіліп жатыр. Нысанды биыл желтоқсанда пайдалануға беру көзделіп отыр.

Перронды қайта құру тұрақта аялдайтын әуе кемелерінің санын 2-ден 9 бірлікке дейін ұлғайтуды көздейді, бұл өз кезегінде әуежайдың транзиттік әлеуетін жақсартады деп күтіліп отыр. Ал асфальтбетон төсеу жұмыстары 2024 жылға жоспарланған.

Қостанай облысына жұмыс сапары барысында көлік министрі Марат Қарабаев аэровокзал мен перрон ғимаратын қайта жаңарту жұмыстарымен танысты.