Қошанов: Агрессорлар кесірінен әйел тағдыры талқыға түсіп, балалар зардап шегеді

Бұл туралы Мәжіліс төрағасы Ерлан Қошанов айтты, деп хабарлайды BAQ.KZ тілшісі.

Бүгін өте маңызды заң қабылдадық. Бұл құжат Мемлекет басшысының тапсырмасымен әзірленіп, заң үстемдігі мен тәртіпті қамтамасыз етуге тікелей бағытталған, - деді ол.

Қошанов отбасы мен тұрмыстағы зорлық-зомбылық қоғамда жиі талқыланатын өзекті және өте өткір мәселе екенін айтты.

Осы мәселені құқық қорғаушылар мен депутаттар ғана айтып жүрген жоқ. Әйелдер мен балалардың қорғансыздығы жайындағы мәселе БАҚ-та, әлеуметтік желіде өте жиі көтеріліп жүр. Агрессорлар мен абьюзерлердің кесірінен қаншама шаңырақ шайқалып, әйел тағдыры талқыға түсіп, балалар зардап шегіп жатыр. Әйелдер мен балаларға қатысты зорлық-зомбылық үшін жауапкершілікті қатайтуды жұртшылық көптен бері талап етіп келеді. Енді жаңа заң бойынша мұндай қылмыстар үшін қатаң шаралар қолданылады. Ол өте орынды, - деді Мәжіліс спикері.

Төраға атап өткендей, әйелдер мен балаларға күш көрсетуге, агрессия мен зорлық-зомбылыққа жол бермеуіміз керек.

Ата-дәстүрлерімізді берік ұстанып, ерлі-зайыптылар арасында шынайы құрмет, сыйластық пен балаларға деген қамқорлық орнығуы қажет. Өте ауқымды жұмыс атқарылды, - деп айтты ол.

Ерлан Қошанов заңды әзірлеуге, қабылдауға қолдау көрсеткен депутаттарға, сарапшылар мен мемлекеттік органдарға алғысын білдірді.

Бүгін Мәжіліс әйелдер мен балалардың құқықтарына қатысты заңды қабылдағанын еске сала кетейік.