Қордайдағы төбелес: қарияның баласын соққыға жыққандар ұсталды

Нұр-Сұлтан, BAQ.KZ. Қордай ауданында қарияның екі баласын ұрып-соққандар ұсталды, деп хабарлайды Tengrinews.kz.

Бұл туралы премьер-министрдің орынбасары Бердібек Сапарбаев баспасөз мәслихатында айтты. Одан журналистер "Қарияның екі баласын ұрып-соққандар туралы ақпарат болды, олар ұсталды ма? Қандай жазаға тартылады?" деп сұрады.

Ұсталды. Қазіргі уақытта тергеу жүріп жатыр, олардың қалай жазаланатыны тергеу аяқталып, сот үкімі шыққанда анықталады. Кеше бізге полицейлерді ұрып-соққандар туралы да сұрақ қойылды. Олар да ұсталды. Ұсталғандарға қатысты қылмыстық іс қозғалды. Тергеу жүріп жатыр, - деп жауап берді Сапарбаев.

Бұған дейін, Азамат Ерғали есімді Facebook қолданушысы Алматыдағы №7 қалалық клиникалық ауруханада жатқан зейнеткердің жағдайын сұраған. Өз кезегінде қария қазақстандықтардан өшікпеуді сұраған. 

Атамыз сау, жағдайы мәз емес. Біраз соққы жеген. Операцияға дайындалып жатқан атаның жағдайы қиын болғанымен, біздің Төлеген ата халықтан өшікпеуді сұрады. Бейбітшілік болса дейді. Ешқандай өш алудың керегі жоғын, халық зардап шегетін салдардың қажеті жоқ екенін айтты. Біздің аталарымыздың жомарттығы бұл. Соларға құлақ асайық, - деген еді қартпен кездесуді видеоға түсірген Азамат Ерғали. 

Айта кетейік, 7 ақпанда Жамбыл облысы Қордай ауданы Масанчи ауылында тұрғындар арасында жаппай төбелес болды.

Жаппай төбелеске 300-ге жуық адам қатысқан. Ауқатты ауылы және Бұлан Батыр ауылдарында жанжал шықты. Бұзақылар атыс қаруын қолданған. 

ДСМ хабарлауынша, медициналық мекемелерге 170 адам көмек сұрап келді. Екі полицей зардап шеккен. Төбелес салдарынан 10 адам көз жұмды.

Сонымен қатар, 30-ға жуық үй, 15 сауда орталығы қираған, 23 көлік өртенген.