Қазпоштада 270 млн теңгеден астам қаржының ұрланғаны анықталды

"Қазпошта" АҚ-да ішкі тергеу жұмыстары жалғасып жатыр, деп хабарлайды BAQ.KZ. 

Осылайша, 2023 жылдың қорытындысы бойынша бірқатар өңірлерде жалпы сомасы 273 000 000 теңге болатын қаржылық заң бұзушылықтар анықталды.

Қазіргі таңда ішкі тексеру материалдары процессуалдық шешім қабылдау және күдіктілерді жауапқа тарту, сондай-ақ келтірілген шығын сомасын өтеу үшін экономикалық тергеу департаментіне жолданды.

Заң бұзушылық фактілері қатарында жымқыру, алаяқтық, ұрлық және заңсыз сыйақы алу фактілері бар. Барлығы 7 өңірлік филиалда 11 қылмыстық іс тіркелді, - делінген хабарламада.

"Қазпошта" АҚ орталықта және жергілікті жерлерде түрлі заң бұзушылық әрекеттермен күресті одан әрі жалғастырады және құқық қорғау органдарымен аталған бағыт бойынша бірлесіп жұмыс істейтін болады.