Қазақстанға ҰҚШҰ бітімгерлік контингенті келе жатыр

Нұр-Сұлтан, BAQ.KZ. Ұжымдық қауіпсіздік туралы шарт ұйымының Бас хатшысы мен осы ұйымның Ұжымдық қауіпсіздік кеңесінің төрағасы, Армения Премьер-министрі Никол Пашинян телефон арқылы сөйлесті, деп хабарлады «ҚазАқпарат» ХАА.

ҰҚШҰ баспасөз хатшысы Владимир Зайнетдиновтың хабарлауынша, 2022 жылдың 6 қаңтарында ҰҚШҰ Бас хатшысы Станислав Зась пен Ұжымдық қауіпсіздік кеңесінің төрағасы, Армения Премьер-министрі Никол Пашинян телефон арқылы сөйлесті.

С.Зась Қазақстан Республикасындағы жағдай туралы айтып, Ұжымдық қауіпсіздік кеңесінің елдегі жағдайды тұрақтандыру үшін елімізге ҰҚШҰ-ның ұжымдық бітімгерлік күштерін жіберу туралы шешімінің қалай орындалып жатқанын жеткізді.

Қазіргі таңда Ресейдің әуе-ғарыш күштерінің әскери-көлік ұшақтарымен бітімгерлік күштері жеткізіліп жатыр.

ҰҚШҰ Ұжымдық бітімгершілік күштерінің басты міндеті маңызды мемлекеттік нысандарды қорғау, ҚР құқық қорғау органдарына жағдайды тұрақтандырып, заңның үстемдік етуін қамтамасыз етуге көмектесу.