Қазақстандықтарға баспанасына қатысты өзгерістер жайлы хабарлама келеді

Қазақстандықтарға жылжымайтын мүліктеріне қатысты өзгерістер жайлы хабарлама келетін болады, деп хабарлайды BAQ.KZ.

Абай облысының баспасөз қызметінің мәліметіне сәйкес мемлекеттік корпорация жылжымайтын мүлікке қатысты мемлекеттік құқықтық кадастрда құқықтарды тіркеу, өзгерту және тоқтату туралы азаматтарды хабардар ету үшін цифрлық сервисті әзірледі.

Енді қазақстандықтар жылжымайтын мүлікке құқықтарды тіркеу, мүлікке салынған ауыртпалықтар, шектеулер, заңды талаптар туралы, сондай-ақ электрондық үкімет порталындағы жеке кабинетіндегі қате мәліметтерді түзету туралы хабарламалар алатын болады. Айтпақшы, енгізілген өзгерістер туралы ақпарат "Жылжымайтын мүлік" бөлімінде сақталатын болады, - делінген ведомство таратқан ақпаратта.

Азаматтар өздерінің жылжымайтын мүліктеріне қатысты мемлекеттік құқықтық кадастрда жасалған барлық әрекетті көре алады. Хабарламалар eGov.kz сайтынан хабарламалар мен PUSH хабарландыруларымен бірге жүретін болады. Жаңашылдық "Бірыңғай мемлекеттік жылжымайтын мүліктің кадастры" ақпараттық жүйесін енгізу барысында жүзеге асырылатын процестерді автоматтандыру аясында әзірленді.

Хабарламаларды жіберу сервисін енгізу азаматтардың жеке деректерінің қауіпсіздігін, қабылданатын барлық әрекетті бақылауды және ақпаратқа жылдам қол жеткізудің қолжетімділігін қамтамасыз ететінін атап өткен жөн.