Қазақстандықтар тамақ пен араққа қанша ақша жұмсайды

Қазақстандағы тұтыну шығындарының құрылымы әлі де болса азық-түлікке жұмсалатын шығындардың үлесінің жоғары екенін көрсетіп отыр, деп хабарлайды BAQ.KZ.

Finratings.kz мәліметінше, елімізде әрбір екінші теңге тамақ пен сусынға жұмсалады. Кейбір өңірлерде темекі де тұтыну себетінде маңызды орынға ие.

2024 жылдың төртінші тоқсанында Қазақстан азаматтарының орташа тоқсандық шығыны 309 300 теңгені құрады, бұл шамамен айына 103 000 теңге деген сөз. Оның ішінде:

• 141 000 теңге — азық-түлік пен сусындарға,

• 7 200 теңге — үйден тыс тамақтануға,

• 4 500 теңге — темекі өнімдеріне,

• 2 000 теңге — алкогольге жұмсалған.

Осылайша, бір адамға шаққандағы азық-түлік тобына (тамақ, сусын, алкоголь және темекі) кететін шығын орта есеппен 155 099 теңгеге жетеді.

Алматылықтар азық-түлікке ең көп қаржы жұмсайды — 218 000 теңге тоқсан сайын, бұл айына шамамен 73 000 теңге:

• Оның ішінде 195 000 теңге – тағам мен алкогольсіз сусындарға,

• 4 800 теңге – алкогольге,

• Қалғаны – темекі және үйден тыс тамақтануға кетеді.

Алматыдан кейінгі орындарда:

• Астана — 187 000 теңге/тоқсан,

• Шығыс Қазақстан облысы — 181 000 теңге.

Ал Шымкент – азық-түлікке ең аз шығындалатын қала: 121 000 теңге/тоқсан, яғни айына 40 000 теңге шамасында.

СҚО-да бір адам темекіге тоқсанына 10 980 теңге жұмсайды. Бұл ел бойынша орташа деңгейден екі есе көп. Мұндай көрсеткіштің себебі нақты белгісіз, бірақ сарапшылар бұл жағдайды аймақ тұрғындарының жасы мен тұтыну әдеттерімен байланыстырады.

Астаналықтар тоқсанына орта есеппен 17 000 теңге үйден тыс тамақтануға жұмсайды — бұл елдегі ең жоғары көрсеткіш. Бұл қалада фастфуд, бизнес-ланч, кафеде тамақтану кең таралғанын көрсетеді.

Дамыған елдерде азық-түлікке жұмсалатын шығын 15%-дан аспайды. Ал Қазақстанда бұл көрсеткіш орта есеппен 50%. Мысалы, Ақмола облысында – ең төменгі үлестің өзі 44%. Бұл азаматтардың табысының жартысы негізгі қажеттіліктерге кететінін, ал білім, жинақ және өмір сапасын арттыруға аз мүмкіндік қалатынын көрсетеді.