Қазақстандық оқушылар Сербияда топ жарды

Қазақстандық оқушылар Сербияның Белград қаласында топ жарды, деп хабарлайды BAQ.KZ.

Жеті күнге созылған Еуропалық географиялық олимпиада (EGeO) өз мәресіне жетті. Білім бәйгесінде Қазақстан құрамасы 3 қола, 2 күміс және 1 алтын медаль жеңіп алды.

Ақтөбедегі физика-математика бағытындағы Зияткерлік мектептің оқушысы Санжар Хамитов үздіктер қатарынан табылып, алтын медаль еншіледі. NIS халықаралық бакалавриат мектебінің оқушысы Аида Давлетова мен Шымкенттегі химия-биология бағытындағы Зияткерлік мектептің оқушысы Қанат Серікбай күміс жүлдеге ие болды. Ал қола ақтөбелік зияткер Әлихан Қалмағамбетов пен Шымкенттегі химия-биология бағытындағы Назарбаев Зияткерлік мектебінің шәкірті Арсен Сыдықовқа бұйырды. Байқауда 3-орын алғандар қатарында Дарын мектебінің шәкірті Жомарт Сабыр да бар.

Айта кетейік, география пәнінен өткен сайысқа барлығы 9 елден 98 оқушы қатысты. Жас географтар мектепішілік оқу-жаттығу жиындарына профессорлардан дәріс алып, халықаралық және рейтингтік олимпиадалардың күнделікті бақылау тапсырмалары бойынша күшейтілген даярлықтан өткен.