Қазақстанда балаларға арналған арнайы SIM-карталар пайда болуы мүмкін

Бұл бастаманы Оқу-ағарту министрлігі көтерді, деп хабарлайды BAQ.KZ.

Вице-министр Еділ Оспан мәлімдегендей, балалар SIM-картасы – балалар мен жасөспірімдерге арналған арнайы тарифтік жоспар. Оған кіріктірілген сүзгі балалардың кейбір сайттарға кіруіне және белгілі бір интернет-контентті қарауына шектеу қояды.

Қазір бұл SIM-карталарды енгізу мәселесі тиісті мемлекеттік органдармен бірлесіп талқыланып жатыр. Біз оны кешенді жоспар жобасына енгіздік. Байланыс операторлары балаларға арнайы SIM-карталар шығаруы керек. Ата-аналар балаларына тек осы карталарды сатып алуға міндеттеледі, – деді Оспан Орталық коммуникациялар қызметіндегі брифингте.

Министрлік халықаралық тәжірибені зерттегенін атап өтті. Басқа елдерде де балаларға арналған SIM-карталар арнайы тарифтік жоспарлар мен сүзгілермен жабдықталады.

Бүгінде интернет арқылы ақпарат алудың негізгі көзі – смартфондар мен SIM-карталар. Бұл жаңа SIM-карталар балалар үшін қауіпсіздік сүзгісі қызметін атқарады, – деді вице-министр.

SIM-карталардың нақты қашан сатылымға шығатыны белгісіз. Қазір жауапты органдар технологиялық шешімдерді қарастырып жатыр.

Министрлік ұсынған балалар SIM-карталарының артықшылықтары:

• Ата-ана бақылауы – баланың телефонды қалай қолданатынын бақылау мүмкіндігі.
• Қауіпсіздік – зиянды контенттен қорғайтын кіріктірілген сүзгілер.
• Геолокация – мобильді қосымша арқылы баланың орналасқан жерін көру мүмкіндігі.

Айта кетейік, бұған дейін Қазақстанда бір адамға 10 SIM-картадан артық рәсімдеуге тыйым салу ұсынылған еді. Бұл бастама әлі қарастырылу үстінде.