Қазақстан мен Қытай сот саласында бірлесе жұмыс істемек

Қазақстан Республикасы Жоғарғы Сотының төрағасы Асламбек Мерғалиев бастаған делегация Қытайдың Үрімші қаласында өткен «Қытай – Орталық Азия» Жоғарғы Сот төрағаларының кеңесіне қатысты, деп хабарлайды BAQ.KZ Жоғарғы Соттың баспасөз қызметіне сілтеме жасап.

Іс-шара трансшекаралық сот төрелігінің өзекті мәселелерін және қылмыспен күресудегі ынтымақтастықты, сондай-ақ қоршаған орта ресурстарын сот арқылы қорғауды дамытуды талқылау үшін Орталық Азия мен Қытайдың жоғары дәрежелі сот өкілдерін жинады.

Сапар барысында қазақстандық делегация құқық қорғау, сот төрелігін цифрландыру және халықаралық қылмыстармен күрес мәселелерін талқылады. Кездесу аясында ҚХР Жоғарғы халық сотының төрағасы Чжан Цзюньмен екіжақты келіссөздер жүргізіліп, оның барысында сот саласындағы ынтымақтастықты нығайту перспективалары талқыланды, - делінген хабарламада.

Кездесудің қорытындысы бойынша қатысушы елдердің сот саласындағы әріптестікті одан әрі дамыту жөніндегі ниетін бекітетін «Үрімші мәлімдемесіне» қол қойылды.