Қазақстан мен Қытай медицина саласындағы ынтымақтастықты кеңейтеді
Алматыда Дүниежүзілік денсаулық сақтау ұйымының (ДДҰ) қолдауымен ұйымдастырылған Қытай Халық Республикасының қатысушыларымен медициналық-санитариялық алғашқы көмек (МСАК) мәселелері бойынша еларалық диалог жұмыс істей бастады, деп хабарлайды BAQ.KZ Денсаулық сақтау министрлігіне сілтеме жасап.
Іс-шараға Денсаулық сақтау министрі Ақмарал Әлназарова, ДДҰ-ның МСАК жөніндегі еуропалық орталығының басшысы Мелитта Якаб, ДДҰ-ның Еуропалық өңірлік бюросының директоры Ханс Клюге, ҚХР Ұлттық денсаулық сақтау комиссиясының МСАК жөніндегі департаменті бас директорының орынбасары Чен Кай қатысты.
Қатысушылар МСАК-ты дамытудың негізгі мәселелерін, тәжірибе алмасуды және екі елдегі медициналық қызметтерді жақсартуға бағытталған инновациялық шешімдерді талқылады.
Ақмарал Әлназарова өзінің кіріспе сөзінде жақында болған сапар барысында танысқан Қытайдағы медициналық технологиялардың жоғары деңгейін атап өтті және елдердің арасындағы тәжірибе алмасу бірлескен даму үшін жаңа перспективалар ашатынына сенім білдірді.
Біз ҚХР өкілдерін қазірдің өзінде денсаулық сақтаудағы үздік тәжірибелер алмасу үшін бірегей алаңға айналған ДДҰ-ның МСАК бойынша демонстрациялық платформасының базасында қабылдағанымызға қуаныштымыз. Біздің ынтымақтастығымыз екі елдің медициналық жүйесін нығайтып қана қоймай, азаматтарымыздың әл-ауқатын арттырудағы маңызды қадам болатынына сенімдімін, - деп атап өтті Әлназарова.
Сондай-ақ министр Қытай тарапына 2023 жылы Мемлекет басшысы айтқан және ДДҰ бас директоры мен ДДҰ-ға қатысушы көптеген елдердің мақұлдауына ие болған МСАК бойынша елдер коалициясын құру жөніндегі Қазақстанның бастамасын қолдауды ұсынды. Диалогтың барысында халықаралық өзара іс-қимылды күшейту және бүкіл өңір бойынша МСАК-тың тиімді практикаларын тарату талқыланды.
ҚХР делегациясының Алматы мен Есік қалаларындағы МСАК мекемелеріне сапарлары, сондай-ақ психикалық денсаулықты сақтау және денсаулық сақтауды цифрландыру сияқты реформалардың негізгі бағыттарын талқылау медицина саласындағы екі ел арасындағы әріптестік қатынастарды одан әрі нығайту үшін негіз болады.