Қазақстан бокстан әлем кубогын қабылдайды

Бокстан World Boxing ұйымы 2025 жылдың жарыстар күнтізбесін жариялады, деп хабарлайды BAQ.KZ тілшісі.

Қазақстан жазда, нақтырақ айтқанда, 30 маусым және 7 шілде аралығында әлем кубогының кезеңін қабылдайтын болды. Бұндай бәсеке боксқа алғаш енгізіліп тұр. Яғни, ерлер мен әйелдер арасындағы үздік боксшылардың басын қосып, бірнеше рет өзара мықтыны анықтайды. 

Қазақстаннан бөлек, Бразилия мен Үндістанда да осындай жарыстар өткізбек және қараша айында қорытынды жарыс, яғни, финалдық турнир ұйымдастырылады. Сол жерде бас жүлде сарапқа салынады. Бұған қоса, әлем чемпионаты өтетін мемлекет пен мерзім ресми жарияланды. 

Жылдың басты бәсекесін Ұлыбританияның Ливерпуль қаласы қабылдайды. Ол 4-14 қыркүйек аралығанда өтеді деп жоспарланып отыр.

Айта кетейік, Қазақстан World Boxing ұйымына былтыр қараша айында қосылды. Ал, қазақстандық кәсіпқой боксшы әрі Ұлттық олимпиадалық комитетінің президенті Геннадий Головкин World Boxing ұйымы арнайы комиссиясының төрағасы болып тағайындалды.