Дариға Назарбаева Қазақ тағамтану академиясына барды

Нұр-Сұлтан, BAQ.KZ. Парламент Сенатының спикері Дариға Назарбаева Алматыдағы жұмыс сапары аясында Қазақ тағамтану академиясы мен «Амиран» балалар сүт тағамдары зауытында болды. Бұл туралы ҚР Парламенті Сенатының баспасөз қызметі хабарлады.

Сенат төрағасы тағамтану академиясында болған кезде еңбек ұжымымен кездесіп, тамақ өнімдерінің сапасы мен қауіпсіздігін бақылау зертханаларымен, сүт өнімдерін өндіру технологиясымен танысты.

Дариға Нұрсұлтанқызы тағамтану академиясындағы халыққа арналған экологиялық таза өнім жасау және оның әлеуметтік бағдары туралы айта келіп, осындағы зерттеу жұмысының маңыздылығын атап өтті.

«Ең алдымен органикалық өнімдер кішкентай балалары бар отбасыларға қолжетімді болуы керек. Бізде бие сүтінен жасалатын балалар тағамдарының өз желісі бар. Оның құрамында қант жоқ. Ондай өнімді өз елінде тұтыну – бүкіл әлем диетологтарының арманы», - деді Назарбаева.

Сенат төрағасы бие сүтінің пайдалы жақтары туралы айта келіп, академия өнімдерінің сапасы жоғары екенін атап өтті.

«Олар өте жаңа әрі таза өнім дайындайды. Жарамдылық мерзімі бір ай не жыл емес, 3-тен 5 тәулік аралығында болуы өнімде балалар мен ересек адамның денсаулығына зиян келтіретін жасанды ештеңе де, химия жоқ екенін көрсетеді», - деді ол.

Төраға Қазақстанда балалар тағамдарының өндірісін ұлғайту қажеттігі туралы айтты.

«Мұндай зауыттардың әр өңірде болғаны және тұтынушыға жақын болуы өте маңызды. Осындай өнім өндірушілерге көмектесу керек. Бұл мәселеге баса назар аударылғаны жөн», - деді ол.

Қазақ тағамтану академиясының президенті Төрегелді Шарманов балалар сүт тағамдарын бие сүтінің негізінде өндіру алғаш рет қолға алынып отырғанын айтты.

«Қазір халыққа ана сүтін алмастыратын аллергенсіз өнім қажет. Ана сүтіне ең ұқсас әрі толыққанды өнім – бие сүті. Мысалы, кішкентайынан сүтке зәру балаларға бие сүтін алаңсыз беріп, одан пайда болмаса зиян шекпейтінін айтып келеміз. Бұл –қуатты өнім, себебі сүт консервілейтін заттар қосылмаған, қайта қалпына келтірілмеген табиғи дүние. Онда дәрумендер, микроэлементтер, сыртқы ақуыз бар. Осының бәрі балалардың жақсы өсуі мен дамуына ықпал етеді. Бие сүтінің негізінде балалар тағамын өндіру – бұл біздің ғылыми жетістігіміз», - деді Шарманов.

Академиктің айтуынша, қазір зауыт бие сүті негізінде ерекше шоколад шығара бастады. Қантсыз, ашытқысыз әрі аллергия болдырмайды.

Еліміздің Тұңғыш Президенті, Елбасы Н.Ә.Назарбаев 2010 жылғы желтоқан айында Қазақ тағамтану академиясының емдік-профилактикалық сүт тағамдарын шығару жөніндегі «Амиран» зауытын іске қосқан болатын. Академия өткен кезеңде зауытта жоғары сапалы табиғи өнімнің ондаған түрін жасап шығарды. Бүгінде кәсіпорын Қазақстанда жоғары сапалы табиғи сүттен жасалған балалар сүт тағамдарын шығаратын алғашқы және жалғыз кәсіпорын болып отыр. Статистикалық деректер бойынша, өткен жылы балалар тағамы тек ЕАЭО елдерінен 43 миллион АҚШ долларынан астам сомаға импортталып, 20103,6 тоннаны құраған.