«Қайыңды-Саты» жолында туристер мінген автобус жол апатына ұшырады

Бұл туралы Алматы облысы полиция департаментінің бастығы Бауржан Аленов хабарлады.

5 қазан күні сағат 14:40 шамасында Кеген ауданы Саты а/о аумағында, «Қайыңды-Саты» таулы автожолының 9 шақырымында 47 жастағы автобус жүргізушісі қарсы қозғалыс жолағына шығып, 1997 жылғы жүргізушінің басқаруындағы «УАЗ» автокөлігімен соқтығысқан, – деді спикер.

Аталған дерек ҚР ҚК 345-бабының 3-бөлімінде көзделген қылмыстық құқық бұзушылық белгілері бойынша Кеген ауданы ПБ-да тіркелді.

Жол-көлік оқиғасы салдарынан 36 жастағы жолаушы оқиға орнында қаза тапты. Сонымен қатар, түрлі дене жарақаттарымен ауруханаға 6 адам жеткізілді, – деді Алматы облысы Полиция департаментінің бастығы.

Қазіргі уақытта осы жол-көлік оқиғасының барлық мән-жайларын объективті зерттеуге бағытталған сараптама тағайындаумен қажетті тергеу әрекеттері жүргізілуде. Автобус жүргізушісі Кеген ауданы ПБ УҰИ-ға қамаққа алынды.

Істі тергеу барысын мен жеке бақылауыма алдым, – деді Бауржан Аленов.