"Қайта оралған Үміт", "Аллигатор": Медиа саласындағы жетістіктер жарияланды

Қазақстан Республикасы Мәдениет және ақпарат министрлігі 2025 жылдың алғашқы жартыжылдығына арналған ақпараттық саясаттың негізгі қорытындыларын жария етті, деп хабарлайды BAQ.KZ.

Есепке сәйкес, БАҚ-ты тіркеу, құқыққа қайшы контентпен күрес, телеөндіріс пен халықаралық ынтымақтастықты дамыту салаларында бірқатар маңызды нәтижелерге қол жеткізілген.

БАҚ реестрі жаңартылды

Бүгінде елімізде 4 871 бұқаралық ақпарат құралы тіркелген:
– 3 002 мерзімді басылым (газет, журнал),
– 236 телеарна,
– 98 радио,
– 1 231 онлайн-басылым мен ақпарат агенттігі.
2025 жылдың алғашқы жартысында 140 БАҚ қызметін тоқтатып, тіркеуден шығарылды (59 газет, 62 журнал, 19 интернет-басылым).

Құқыққа қайшы контентпен күрес

Интернет желісінен 74 130 заңсыз материал анықталып, оның 36 667-сі жойылды.
Онлайн платформалардан табылған 49 896 контенттің 12 433-і өшірілген.

Бірлескен телеөнімдер мен жобалар

– «Евразия» арнасы мен Ресейдің «Первый канал» арнасы «Аллигатор» атты 8 сериялы сериал түсірді.
– «Qazaqstan» арнасы мен Түркияның «Kanal D» арнасы «Қайта оралған Үміт» атты 100 бөлімдік телехикаяны жарыққа шығармақ.
– «24KZ» арнасы мен Қытайдың CCTV‑4 арнасы «Ортақ үй» атты деректі фильмді ұсынды.
– «Хабар» арнасы «Ұлы дала мен Аспан асты елі: көршілер, серіктестер, достар» фильмін көрсетті.

Халықаралық ынтымақтастық

Euronews арнасымен бірлесіп:
– «Modern Nomads» – 12 шығарылым
– «East West Connect» – 6 шығарылым
– «Voices from Central Asia» – 6 шығарылым
– «Focus» – 3 репортаж дайындалды.
Сондай-ақ, наурыз-маусым айларында Euronews Academy аясында журналистика және медиаменеджмент бойынша 4 кәсіби курс ұйымдастырылған.

Таралым аясын кеңейту

«Сұр табақшалар» науқаны аясында отандық спутниктік аппараттарды сатып алуды ынталандыру үшін субсидиялау бағдарламасы іске қосылды. Алматы, Жамбыл және Түркістан облыстарында 300-ден астам құрылғыға қолдау көрсетілді. Жақын уақытта шекаралас аймақтарда 3 000-нан астам аппаратты қолдану жоспарланып отыр.