Қайрат Нұртастың түрмеден қашан шығатыны белгілі болды

Танымал әнші Қайрат Нұртастың түрмеден қашан шығатыны белгілі болды, деп хабарлайды BAQ.KZ тілшісі.

Әншінің анасы Гүлзира Айдарбекова ұлын 19 шілдеде босатып алатынын Instagram-да жазды.

Қайрат Нұртас ұшақта қоғамдық тәртіпті бұзғаны үшін 15 тәулікке қамалған болатын.

Сот процесінде Қайрат Нұртас ұшақта Бекқайыровпен жанжалдасып, оған қол жұмсап, денсаулығына жеңіл зиян келтіріп, балағат сөздер айтқаны анықталған еді.

9 шілдеде Астана қалалық сотында Қайрат Нұртасқа қатысты әкімшілік құқық бұзушылық туралы іс апелляциялық тәртіппен қаралды. Алайда қаулының күшін жоюға негіз анықталмағандықтан апелляцияның 2024 жылғы 9 шілдедегі қаулысымен бірінші сатыдағы соттың сот актісі өзгеріссіз қалдырылды.

Бұған дейін танымал шоумен Тұрсынбек Қабатов та ұшақта құқық бұзып, 5 тәулікке қамалған болатын.