Қатар елімен өзара іс-қимылды одан ары жалғастыруға ниеттіміз - Смайылов

Доха қаласында өтіп жатқан Қатар экономикалық форумы аясында Премьер-министр Әлихан Смайылов Power International Holding төрағасы Мутаз әл Хайятпен кездесті, деп хабарлайды BAQ.KZ.

Тараптар медицина, ауыл шаруашылығы және туризм салаларындағы инвестициялық жобаларды жүзеге асыру мәселелерін талқылады. Power International Holding - Таяу Шығыстағы ірі конгломераттардың бірі. Оның қатысуымен футболдан Әлем чемпионаты қарсаңында Қатарда үлкен объектілер салынды. Холдингтің негізгі бағыттары құрылыс, ауыл шаруашылығы, өнеркәсіп, денсаулық сақтау сынды салаларды қамтиды.

Бұлардың барлығы Қазақстан экономикасы үшін басым секторлар болып табылады. Біздің өзара тиімді серіктестікті дамытуымыз үшін зор әлеуетіміз бар, - деді Премьер-министр.

Сондай-ақ ол Power International Holding-і Қатар мен Қазақстан арасында әріптестік байланысты орнату және дамытуда өзіндік көшбасшыға айналғанын атап өтті.