Қарағанды облысының Нұра ауданында өрт сөндіру бекеті ашылды

Нұра ауданы Изенді ауылында өрт сөндіру бекеті ашылды. Ол Кенжарық ауылдық округіне қызмет көрсетеді, деп хабарлайды BAQ.KZ.

Өртке қарсы құралымның төрт қызметкері қажет болған жағдайда өртті жедел сөндіруге жұмылдырылады.

Өрт сөндірушілердің қарамағында 4-текше сыйымдылығы бар МТЗ-82 тракторы, су соруға арналған мотопомпасы, 500 литрлік жоғары қысымды аппараты, өрт жеңдері мен шартылдақ бар. Жақын арада өрт сөндірушілер екі тонналық автоцистерна алады.

Биыл Нұра ауданында өрт санының төмендеуі байқалады. Дегенмен, ауылдық округтерде өрт сөндіру бекеттерін ашу керек кезде өртті дер кезінде жою және сөндіру үшін қажет, – дейді Нұра ауданы ТЖБ бастығы Бекболат Исаев.

Нұра ауданында өрт сөндіру бекеттері 17 елді мекенде жұмыс істейді. Олардың алтауында ірі өрттерді сөндіруге арналған автоцистерналар бар. Болашақта Ахмет ауылында тағы бір бекет ашылады.

Осы жазда Қарағанды облысында алты өрт сөндіру бекетін ашу жоспарлануда.