Қарағанды облысында блокбекеттер қойылды

Мал ұрлығының алдын алу және оған тосқауыл қою мақсатында Қарағанды облысының тасжолдарында 18 жылжымалы блок-бекет қойылды, деп хабарлайды BAQ.KZ.

Полиция қызметкерлері аталған бекеттерде мал және ет өнімдерін тасымалдаушыларды тоқтатып, құжаттарының белгіленген талаптарға сай болуын тексереді.

Жыл басынан бастап облыс аумағында 25 мал ұрлығы тіркеліп, оның 18-і ашылды. Мәселен, өткен аптада Бұқар жырау аудандық полиция басқармасының қызметкерлері аудан тұрғынының құны 1 миллион тұратын Голштейн асыл тұқымды ірі қарасын ұрлаған күдіктілерді ұстады. Аталған дерек бойынша қылмыстық іс қозғалып, тергеу әрекеттері жүргізіліп жатыр. Полиция қызметкерлерінің айтуынша, аталған блок бекеттер ерекше үкімге дейін жұмыс атқаратын болады, - деді ҚР ІІМ баспасөз қызметі

Мал ұрлығының басым бөлігі еркін жайылымда болса, кейбір жағдайларда мал иесі төрт түлігінің қай уақытта жоғалғанын білмейтін кездер болады.

Полицияға жайылымнан мал жоғалу бойынша 17 арыз түсіп, жүргізілген іздестіру іс-шаралары барысында 106 мал, яғни 56 жылқы, 12 ірі қара мал, 38 ұсақ мал табылды, - делінген хабарламада.

Қарағанды облысының полиция департаменті облыс тұрғындарынан жүргізіліп жатқан іс-шараларға түсіністік танытып, өз мүліктеріне сақтықпен қарауға шақырады.